ينتەرپول ىزدەۋدە جۇرگەن ازاماتتار تىزىمىنەن بتا بانكتىڭ بۇرىنعى باسشىسى، وپپوزيتسيالىق ساياساتكەر مۇحتار ءابىلازوۆتى الىپ تاستادى.

ءابىلازوۆتىڭ قورعاۋشىسى پيتەر سالاستىڭ ايتۋىنشا، ينتەرپولدىڭ ءابىلازوۆتىڭ ۇستىنەن «قىزىل حابارلاما» بەلگىسىن الىپ تاستاپ، ىزدەۋدە جۇرگەن ازاماتتار تىزىمىنەن شىعارۋى، ونىڭ ەركىن ءجۇرىپ-تۇرۋىنا مۇمكىندىك بەرەدى.

ينتەرپولدىڭ «قىزىل حابارلاما» بەلگىسى ينتەرپولعا مۇشە ەلدەردىڭ قۇقىق قورعاۋ ورگاندارىنا ىزدەۋدە جۇرگەن ازاماتتى تۇتقىنداپ، ىزدەۋ سالۋشى ەلگە ەكستراديتسياداۋدى مىندەتتەيدى.

ەستەرىڭىزگە سالايىق، مۇحتار ءابىلازوۆ 2005 -2009 جىلدارى ارالىعىندا بتا بانكتەن 6 ميلليارد  دوللار كولەمىندە قارجى جىمقىردى دەپ ايىپتالعان بولاتىن. ءابىلازوۆ 2013 جىلى فرانتسيادا ۇستالىپ، 2014 جىلدىڭ قاڭتار ايىندا فرانتسيانىڭ تومەنگى ينستانتسياداعى سوتى ونى  رەسەيگە ەكستراديتسيالاۋعا شەشىم شىعارعان. بىراق ءساۋىر ايىندا فرانتسيانىڭ كاسساتسيالىق سوتى بۇل شەشىمنىڭ كۇشىن جويعان.

كەيىننەن ليون قالاسىنىڭ اپەللياتسيالىق سوتى ءابىلازوۆتى رەسەيگە ەكستراديتسيالاۋدى قولداپ جانە ءبىر شەشىم شىعارعان ەدى. بىراق بۇل شەشىمدى دە 2016 جىلدىڭ 9 جەلتوقسانىندا فرانتسيا مەملەكەتتىك كەڭەسى جوققا شىعارىپ، ءابىلازوۆتى رەسەيگە بەرمەي قويعان بولاتىن.

فرانتسيا سوتىنىڭ شاماسى جەتپەگەن وپپوزيتسيالىق ساياساتكەر مۇحتار ءابىلازوۆتى الماتى قالاسىنىڭ سوتى شىلدەنىڭ 7-ءسى كۇنى سىرتتاي 20 جىلعا سوتتاعان.

“The Qazaq Times”