ەۋرووداق "يەگوۆا كۋاگەرلەرىن" جاقتاپ وتىر

ەۋرووداق رەسەيدى "يەگوۆا كۋاگەرلەرى" قاۋىمداستىعىنا ەركىن جينالىستار ۇيىمداستىرۋعا رۇقسات بەرۋگە شاقىردى. بۇل تۋرالى ەۋرووداقتىڭ ديپلوماتيالىق وكىلىنىڭ رەسەيگە جولداعان رەسمي ۇندەۋىندە ايتىلعان.

جۋىردا رەسەيدىڭ جوعارعى سوتى "يەگوۆا كۋاگەرلەرى" قاۋىمداستىعىن "ەكسترەميستىك توپ" دەپ تاۋىپ، مەملەكەت تەرريتورياسىندا ونىڭ قىزمەتىنە تىيىم سالعان بولاتىن. ەۋرووداقتىڭ رەسمي وكىلى سوتتىڭ شەشىمى بۇل سەنىم يەلەرىنىڭ قۋدالاۋعا ۇشىراۋىنا اكەلىپ سوقتى دەپ ەسەپتەيدى.

رەسەيگە جولدانعان قۇجاتتا: "يەگوۆا كۋاگەرلەرى دە بارلىق باسقا ءدىني توپتار سياقتى مەملەكەتتىڭ ارالاسۋىنسىز، ەركىن جينالىستار وتكىزۋگە قۇقىلى. بۇل ادام قۇقىقتارى جونىندەگى حالىقارالىق شارتتار مەن رەسەيدىڭ كونستيتۋتسياسىندا كورسەتىلگەن", -دەلىنگەن.

رەسەيدە قابىلدانعان شەشىمنەن كەيىن، "يەگوۆا كۋاگەرلەرى" قاۋىمداستىعىنىڭ بارلىق مۇلكىن تاركىلەۋگە، ال قارسىلىق بىلدىرگەندەردى قىلمىستىق جاۋاپكەرشىلىككە تارتۋعا بۇيرىق بەرىلدى.

"يەگوۆا كۋاگەرلەرى" ۇيىمى 1931 قۇرىلعان، شتاب-پاتەرى - نيۋ-يوركتە. رەسەيدە 2,5 مىڭ قاۋىمداستىققا بىرىككەن بۇل اعىمنىڭ سوڭىنان ەرۋشى 175 مىڭ ادام بار.

“The Qazaq Times”