فوتو: Forbes

اقتوبە وبلىسىنىڭ اكىمى بەردىبەك ساپارباەۆتىڭ سوزىنشە، وبلىس الەۋمەتتىك-ەكونوميكالىق دامۋ بويىنشا كوشباسشى ايماقتاردىڭ اراسىندا. بۇل تۋرالى ول ايماقتىق باق وكىلدەرىمەن كەزدەسۋ بارىسىندا مالىمدەدى، دەپ حابارلايدى قازاقستان - 2050 سايتى.

«ستاتيستيكا مالىمەتتەرى بويىنشا ءبىرىنشى جارتى جىلدىقتىڭ ىشىندە وبلىس بويىنشا ەكونوميكا ءوسىمى شامامەن 4 % قۇرادى. بارلىق نەگىزگى الەۋمەتتىك-ەكونوميكالىق كورسەتكىشتەر وتكەن جىلدان جوعارى جانە رەسپۋبليكالىق دەڭگەيدەن تومەن ەمەس»،-دەدى بەردىبەك ساپارباەۆ.

ەسەپتىك كەزەڭدە ونەركاسىپتىك ءونىم ءوندىرىسىنىڭ كولەمى 4,9% ارتتى. ونەركاسىپتىك كاسىپورىندارمەن 700 ملرد تەڭگەنىڭ ءونىمى وندىرىلگەن.

اقتوبە وبلىسى اكىمدىگىنەن حابارلاعانداي، وڭدەۋ ونەركاسىبى 111,4% ءوستى. وسى كورسەتكىش بويىنشا وبلىس قازاقستان وڭىرلەرى اراسىندا ەكىنشى ورىندى يەلەندى.

نەگىزگى كاپيتالعا قۇياتىن ينۆەستيتسيا دا ەڭ ۇلكەن كورسەتكىشكە يە، شامامەن 131,8%.

ءوڭىر ەكونوميكاسىنا 160 ملرد تەڭگەدەن اسا قارجى تارتىلدى. اعىمداعى جىلى 1700 جاڭا جۇمىس ورىندارىن اشا وتىرا جالپى قۇنى 33 ملرد تەڭگە بولاتىن 17 ينۆەستيتسيالىق جوبانى جۇزەگە اسىرۋ جوسپارلانىپ وتىر.

جالپى، وڭىردە 8,2 مىڭ جاڭا جۇمىس ورىندارى قۇرىلدى. جىل  سوڭىنا دەيىن تاعى وسىنشا قۇرىلاتىن بولادى.

“The Qazaq Times”