قازاقستاندا كريپتوۆاليۋتاعا قاتىستى زاڭ جوباسى ازىرلەنىپ جاتىر

 قازاقستاندا ارنايى جۇمىس توبى كريپتوۆاليۋتا ترانزاكتسيالارىن رەتتەيتىن زاڭ جوباسىن ازىرلەپ جاتىر. جۇمىس توبىنا "استانا" حالىقارالىق قارجى ورتالىعى، "دەلويت", Waves, Juscutum جانە "كەسارەۆ كونسالتينگ" سىندى ۇيىمدار كىرگەن دەپ حابارلايدى LS.

بۇل كومپانيالار تەك قۇقىقتىق قۇجات دايىنداپ قانا قويماي، بولكچەين تەحنولوگيالار مەن كريپتوۆاليۋتانى قولداناتىن پلاتفورمالاردى جانە بلوكچەين جوبالارىن قۇرۋعا نيەتتى.

"قازاقستان جاپونيادان كەيىنگى مەملەكەتتىك دەڭگەيدە كريپتوۆاليۋتا جۇيەسىن دامىتۋ كەرەك ەكەنىن ءتۇسىنىپ وتىرعان ەكىنشى مەملەكەت. احقو بازاسىندا تسيفرلى ۆاليۋتا نارىعىن دامىتۋ - قازاقستاننىڭ تسيفرلى ەكونوميكاسى ءۇشىن تولىققاندى ەكوجۇيە قۇرۋعا جاسالعان قادام", - دەيدى  "كەسارەۆ كونسالتينگ"كومپانياسىنىڭ سەرىكتەسى ناتاليا شەيكو.

ايتا كەتەيىك، بۇعان دەيىن ۇلتتىق بانك ازىرگە كريپتوۆاليۋتا جۇيەسىن رەتتەۋ تاسىلدەرىن قاراستىرىپ جاتقانىن مالىمدەگەن. سونداي-اق ساراپشىلار دا بۇل جۇيەنىڭ تاۋەكەلدەرى كوپ ەكەنىن ايتقان.

“The Qazaq Times”