سولتۇستىك كورەيانىڭ كيبەر شابۋىل قۋاتى بارعان سايىن ارتىپ كەلەدى. فوتو: Vox.

سولتۇستىك كورەيا حاكەرلەرى قورعانىس جۇيەلەردى تالقانداپ، الەمدىك ينتەرنەت جۇيەسىنە شابۋىلداۋ قۋاتىن تاباندى تۇردە ارتتىرىپ كەلەدى. سولتۇستىك كورەيانىڭ Lazarus Group دەپ اتالاتىن حاكەرلەر توبى 2014 جىلى Sony Pictures كومپانياسىنىڭ كومپيۋتەرلىك جۇيەسى ارقىلى «سۇحبات» ءفيلمىنىڭ تاراتىلۋىنىڭ الدىندا كيبەرلىك كيلىگۋ جاسادى. سونداي-اق، بۇل توپ 2016 جىلى الەمدىك تولەم جۇيەسىن پايدالانا وتىرىپ، بانگلادەشتىڭ ورتالىق بانكىنەن شامامەن 1 ملرد اقش دوللارىنا جۋىق قارجىنى ۇرلاۋعا ارەكەت جاسادى.

الايدا، وسى ءبىر وقشاۋلانعان ءارى رەسۋرستارى شەكتەۋلى، ەكونوميكالىق سانكتسيادا تۇرعان ەلدىڭ كيبەرشابۋىلعا سونشالىقتى قابىلەتتى بولعانى الەم جۇرتشىلىعىن تاڭداندىرادى. سونىمەن بىرگە، سولتۇستىك كورەيالىق حاكەرلەردى، ولاردىڭ كيبەرشابۋىل ارەكەتتەرىن كىمدەر قولداپ وتىر دەگەن سۇراق مازالايدى.

وڭتۇستىك كورەيالىق ەكسپەرتتەردىڭ كورسەتكەن دالەلدەرىنە قاراعاندا، سولتۇستىك كورەيا كيبەر-سوعىستا قىتايدان كوپ قولداۋ الادى، قىتايدان كيبەرشابۋىل ادىستەرىن ۇيرەنەدى. سونداي-اق، سولتۇستىك كورەيالىق حاكەرلەر قىتاي مەن ەۋروپادا ارەكەت ەتەدى. بۇل جاعىندا سولتۇستىك كورەيا كريپتو-ۆاليۋتالىق سايتقا كىرۋ نەمەسە اقپارات ۇرلاۋ سىندى ناقتى باعىتتا جۇمىس ىستەيدى. مالىمەتتەردە، قازىرگى كەزدە سولتۇستىك كورەيانىڭ اسكەري كيبەر شابۋىل قوسىنىندا شامامەن 6000-7500 ادام جۇمىس ىستەيدى. ولار ءتور توپقا بولىنگەن. ولاردىڭ باستى مىندەتى باسقا ەلدەردەگى ينفراقۇرىلىمعا جانە قارجىلىق قىزمەتتەرگە ارنالعان كيبەر-تەررورلىق شابۋىلداردى جۇزەگە اسىرۋ، جاڭا قورعانىس تەحنولوگيالارىن ۇرلاۋ.

كيبەر-سوعىستا قۋاتتى كۇشكە يە بولۋ ءۇشىن كحدر بيلىگى 1993 جىلى ۇكىمەت قۇرامىندا ءوزىنىڭ العاشقى جەلىلىك اگەنتتىگىن قۇرعان. قازىر حالىقارالىق سانكتسيا سولتۇستىك كورەيا رەجيمىن قارجىلىق قيىنشىلىقتارعا ۇشىراتتى. سوندىقتان دا، ولار كيبەرشابۋىلداردى  ۇكىمەتتىك جەلىلەردەن جەكەمەنشىك جەلىلەرگە قاراي اۋىستىردى. سەبەبى، كىشىگىرىم كاسىپورىنداردىڭ قورعانىس جۇيەسى سونشالىقتى بەكەم بولا بەرمەيدى.

بىرقاتار ەلدەر سولتۇستىك كورەيا الەمدىك قارجى جۇيەسىنە كريتوۆاليۋتا جۇيەسى ارقىلى بيتكوين سەكىلدى ەلەكتروندى ۆاليۋتا ۇرلادى دەپ ايىپتايدى. كريپتو-ۆاليۋتالاردى زاڭدى تۇردە الۋ ءۇشىن جوعارى دارەجەلى كومپيۋتەر قاجەت. الايدا، سولتۇستىك كورەيادا مۇنداي مۇمكىندىك جوق. سوندىقتان ولار شەتەلدىك كومپيۋتەرلىك جۇيەلەرگە كىرۋ ارقىلى بۇل وپەراتسيانى جۇزەگە اسىرادى. ينتەراكتيۆتى كومپيۋتەر ارقىلى ۆيرتۋالدى ۆاليۋتانى سولتۇستىك كورەيانىڭ ەلەكتروندىق ءاميانىنا سالادى. كەيىن ونى ناقتى اقشاعا اينالدىرادى.

ساراپشىلاردىڭ پىكىرىنە سەنسەك، سولتۇستىك كورەيانى كيبەر-سوعىستى توقتاتۋعا شاقىرۋ، كورەي تۇبەگىندە بەيبىتشىلىك ورناتۋمەن ءبىر دەڭگەيدەگى شارۋا. قازىرگى الەم ەلدەرى اراسىنداعى كيبەر-سوعىستىڭ كۇردەلىلىگى دە سولتۇستىك كورەيانىڭ بۇل جاعىنداعى شابۋىلدارىن توقتاتۋدا قيىندىقتار تۋدىرعان.

“The Qazaq Times”