فوتو: kapital.kz

بىرىڭعاي جيناقتاۋشى زەينەتاقى قورىنىڭ مەنشىكتى اكتيۆتەرىن ۇلتتىق بانكتىڭ باسقارۋىنا بەرۋ پروتسەسى اياقتالدى. بۇل تۋرالى بجزق باسقارما توراعاسى ءنۇربۇبى ناۋرىزباەۆا ەگەمەن قازاقستان گازەتىنە بەرگەن سۇحباتىندا مالىمدەدى.  

"قور جۇمىسىنا قاجەتتى كوپتەگەن ىشكى نورماتيۆتىك قۇجاتتار قايتا قارالدى جانە جاڭا رەداكتسيادا ازىرلەندى. سونىمەن قوسا، ديرەكتورلار كەڭەسى جىل باسىندا زەينەتاقى اكتيۆتەرى سياقتى بجزق مەنشىكتى اكتيۆتەرىن باسقارۋدى قازاقستان رەسپۋبليكاسى ۇلتتىق بانكىنىڭ سەنىمگەرلىك باسقارۋىنا بەرۋ تۋرالى شەشىم قابىلدادى. بجزق مەنشىكتى اكتيۆتەرىن ۇلتتىق بانكتىڭ باسقارۋىنا بەرۋ پروتسەسى اياقتالدى", - دەدى باسقارما توراعاسى.

ونىڭ سوزىنشە، زەينەتاقى جيناقتارىنىڭ جالپى سوماسى 2017 جىلعى 1
ماۋسىمداعى جاعداي بويىنشا 6,99 ترلن تەڭگەنى قۇرادى، ال 2 ماۋسىمدا
7 ترلن تەڭگەدەن اسقان. وسى جىلدىڭ بەس ايىندا زەينەتاقى جيناقتارى 310 ملرد تەڭگەگە ۇلعايىپ، ءوسىم 4,6 پايىزدى قۇراعان.

سونداي-اق، ول سالىمشىلاردىڭ زەينەتاقى اكتيۆتەرىنە مەملەكەت كەپىلدىك بەرەتىنىن دە تاعى ءبىر مارتە اتاپ ءوتتى.

ء"بىز سالىمشىلار مەن الۋشىلارعا زەينەتاقى اكتيۆتەرى جان-جاقتى باقىلاۋدا بولاتىندىعىن جانە ولاردىڭ ساقتالۋىنا، قايتالاپ ايتامىن، مەملەكەت كەپىلدىك بەرەتىنىن تۇسىندىرەمىز. سونداي-اق وسى اقپاراتتى بارلىق سالىمشىلار مەن الۋشىلارعا دەيىن ءاربىر ءباسپاسوز كونفەرەنتسيالارىندا، حالىقپەن كەزدەسۋلەردە جەتكىزىپ وتىرامىز", - دەدى ول سۇحباتىندا.

ايتا كەتەيىك، وسىعان دەيىن بجزق-نىڭ 71,3 ملرد تەڭگەسى نەمەسە 200 ملن دوللار ازەربايجان حالىقارالىق بانكىنىڭ وبليگاتسيالارى ءۇشىن سالىنعانىن ايتقان بولاتىنبىز. Bloomberg اگەنتتىگىنىڭ مالىمەتىنشە، ازەربايجاننىڭ حالىقارالىق بانكى ەلدەگى ۆاليۋتالىق داعدارىس پەن ۆاليۋتانىڭ جەتىسپەۋشىلىگىنە بايلانىستى سىرتقى قارىزدارىن تولەۋدى توقتاتقان.

ال ۇلتتىق بانك توراعاسى دانيار اقىشەۆ ازەربايجان حالىقارالىق بانكىنە ينۆەستيتسيالانعان 71,3 ملد تەڭگەگە قاتىستى جاعدايدى ءتۇسىندىرۋ كەزىندە  "بۇل قارجىنى پروبلەمالى بانككە ۇلتتىق بانكتىڭ بۇرىنعى قىزمەتكەرلەرى ينۆەستيتسيالاعان" دەگەن ەدى.

“The Qazaq Times”