فوتو: Kursiv.kz

اقمولا وبلىسىنا قاراستى اتباسار قالاسىندا 21 جاستاعى ۇلتتىق قاۋىپسىزدىك كوميتەتىنىڭ اگەنتى ايدىن ايپقاليەۆتىڭ ۇستىنەن تەرروريزمدى ناسيحاتتاعىنى ءۇشىن قىلمىستىق ءىس قوزعالدى دەپ حابارلايدى centre1.com سايتى.

ايدىن ايپقاليەۆ ۇستىنەن 2017 جىلدىڭ 25 قاڭتارىندا قر قىلمىستىق كودەكسىنىڭ 174 بابىنىڭ 1 تارماعى (الەۋمەتتىك، رۋلىق، ناسىلدىك، ۇلتتىق، ءدىني ارازدىق تۋعىزۋ) بويىنشا، 256 باپتىڭ 2 تارماعى (تەرروريزمدى ناسيحاتتاپ، تەررورلىق اكت جاساۋعا ۇگىتتەۋ) بويىنشا قىلمىستىق ءىس قوزعالىپ، قاماۋعا الىنعان.

ايدىن ايپقاليەۆ. فوتو: centre1.com

بىراق، ايدىن ايپقاليەۆتىڭ اناسى گۇلجان ايپقاليەۆانىڭ ايتۋىنشا، ونىڭ ۇلى قىلمىسكەر ەمەس. ول ۇقك تاپسىرماسى بويىنشا وزگە ءدىننىڭ جەتەگىندە جۇرگەن ادامدارمەن ارالاسقان. ۇقك قىزمەتكەرلەرى ولاردىڭ ۇيىنە ءتىنتۋ جاساۋعا كەلگەندا ايدىن اناسىنا «مەن وسىلارعا جۇمىس ىستەيمىن. ماعان دانيار (ۇقك قىزمەتكەرى) تاپسىرما بەرگەن» دەپ ايتقان.

ايدىن ايپقاليەۆ قامالۋىنان بىرنەشە كۇن بۇرىن اناسىنا "ۇلتتىق قاۋىپسىزدىك كوميتەتىنە جۇمىس ىستەۋدەن باس تارتقانى جانە ولاردىڭ ونى وسى ۋاقىتقا دەيىن الداپ كەلگەنى جايىندا دا ايتقان.

گۇلجان ايپقاليەۆانىڭ سوزىنشە، ۇقك قىزمەتكەرلەرى ايدىن ايپقاليەۆقا «ءبىزدىڭ جۇمىسىمىز ادامداردى تۇرمەگە قاماۋ ەمەس، ءبىزدىڭ جۇمىس تەرروريزمنىڭ الدىن الۋ. وزگە اعىمداردىڭ جەتەگىندە جۇرگەن ازاماتتاردى ءتۇزۋ جولعا سالۋ» دەگەن. بىراق  ايدىن ايپقاليەۆ ءوزىنىڭ كەسىرىنەن وزگە ادامدى سوتتاعاننان كەيىن ۇقك-گە جۇمىس ىستەۋدەن باس تارتقان. وسى كەزدە ۇلتتىق قاۋىپسىزدىك كوميتەتىنىڭ قىزمەتكەرلەرى وعان «ەگەردە بىزگە جۇمىس ىستەمەسەڭ، وندا سەنى دە تۇرمەگە قامايمىز» دەپ قورقىتقان.

ايدىن ايپقاليەۆتىڭ قورعاۋشىسى ايمان وماروۆانىڭ ايتۋىنشا، ايپقاليەۆ 16 جىسىنان باستاپ ۇلتتىق قاۋىپسىزدىك كوميتەتىنە جۇمىس ىستەگەن.

بۇل فاكتىنى العاشىندا وسى ءىس بويىنشا كۋاگەرلىك ەتكەن ۇقك قىزمەتكەرى دە راستاعان. بىراق، كەيىنەن ول بۇل سوزىنەن باس تارتقان.

قۇقىق قورعاۋ ورگاندارىنىڭ مالىمەتى بويىنشا، ايدىن ايپقاليەۆ ءتۇرلى حالىقارالىق تەرروريستىك ۇيىمداردىڭ شىرماۋىنا ءتۇسىپ «ۆكونتاكتە» الەۋمەتتىك جەلىسى ارقىلى ولاردىڭ يدەولوگياسىن ناسيحاتتاعان.

بىراق ۇقك-نىڭ ايپقاليەۆقا تاققان بۇل ايىبىمەن ونىڭ قورعاۋشىسى ايمان وماروۆا كەلىسپەيدى. ونىڭ ايتۋىنشا، ايپقاليەۆتىڭ راديكالدى ءدىني ۇيىمدار يدەولوگياسىن ناسيحاتتاۋىنىڭ باستى سەبەبى  - جاستايىنان ۇلتتىق قاۋىپسىزدىك كوميتەتىنىڭ ونى وسى ۇيىمداردىڭ اراسىنا كىرگىزۋىنىڭ سالدارىنان. زاڭ جۇزىندە ۇقك-نىڭ ايپقاليەۆتى كامەلەتتىك جاسقا تولماي وزىنە قىزمەت ىستەتۋگە قۇقىعى جوق.

قازىرگى ۋاقىتتا ايپقاليەۆتىڭ جاقىندارى ونىڭ قورعاۋشىسىمەن بىرىگىپ بۇل ىسكە بايلانىستى ءوز زەرتتەۋلەرىن جۇرگىزۋدە. ولاردىڭ ويىنشا، بۇل ءىستىڭ انىق-قانىعىنا جەتۋ ءۇشىن بۇل وقيعاعا قوعام نازارىن اۋدارتۋ كەرەك.

“The Qazaq Times”