قازاقستاندا ونكولوگيالىق اۋرۋدى ەمدەۋدە «جاساندى ينتەللەكت» پايدالانىلادى

قازاقستاننىڭ ەمحانالارىندا ونكولوگيالىق اۋرۋلاردى ەمدەۋ ءۇشىن «جاساندى ينتەللەكت» پايدالانىلادى.

IBM كومپانياسىمەن جاسالعان ەكىجاقتى كەلىسىمنىڭ اياسىندا جاساندى ينتەللەكت ارقىلى ناۋقاسقا قانداي ەم قولدانۋ كەرەكتىگى انىقتالادى. تەحنولوگيانىڭ دەرەكتەر بازاسىندا مىڭداعان عىلىمي ماقالالار مەن قۇندى دەرەكتەر ورنالاستىرىلادى. بۇل الەمنىڭ وزىق تاجىريبەسى مەن الدىڭعى قاتارلى جەتىستىكتەرىن پايدالانا وتىرىپ، ناۋقاستارعا جەدەل كومەك كورسەتۋگە جول اشادى. اتالعان پيلوتتىق جوبا وسى جىلدىڭ كۇزىنەن باستاپ جۇزەگە اسىرىلماق. بۇل تۋرالى قر دەنساۋلىق ساقتاۋ ءمينيسترى ەلجان ءبىرتانوۆ مالىمدەدى.

مۇنان بولەك، «قازاقتەلەكوم» اق بىرلەسىپ جاساعان midmail.kz بىرىڭعاي پوشتا جۇيەسى ىسكە قوسىلدى. قازىردىڭ وزىندە بۇل قىزمەتتى 80 مىڭعا جۋىق دارىگەر قولدانادى. مەديتسينا قىزمەتكەرلەرىنىڭ ءوزارا تاجىريبە الماسىپ، توپتار قۇرىپ، بەلگىلى ءبىر ماسەلە بويىنشا پىكىر بولىسۋىنە مۇمكىندىك بەرەتىن جۇيەنىڭ ارتىقشىلىقتارى كوپ دەيدى مينيسترلىك وكىلدەرى.

“The Qazaq Times”