قىزىلوردا وبلىسىندا قر پرەمەر-ءمينيسترى باقىتجان ساعىنتاەۆ شالقيا قورعاسىن-مىرىش كەن ورنىن قالپىنا كەلتىرۋ بويىنشا جۇمىسپەن تانىستى جانە تاۋ-كەن بايىتۋ كومبيناتىنىڭ (تبك) قۇرىلىسىن قارجىلاندىرۋ تۋرالى كەلىسىمگە قول قويۋ راسىمىنە قاتىستى دەپ حابارلايدى قر ۇكىمەتىنىڭ ءباسپاسوز قىزمەتى.

قر پرەمەر-ءمينيسترى باقىتجان ساعىنتاەۆ شالقيا قورعاسىن-مىرىش كەن ورنىن ارالاپ، كەنىش قۇرىلىسىنىڭ جاعدايىمەن تانىسۋ ءۇشىن شاحتاعا ءتۇستى.

«تاۋ-كەن سامۇرىق» اق باسقارما توراعاسى ءماجيت تۇرماعانبەتوۆ كوپ جىلدار بويى توقتاپ تۇرعان كاسىپورىندا تاۋ-كەن دايىندىق جۇمىستارى جۇرگىزىلگەنىن، ينفراقۇرىلىم نىساندارى مەن الەۋمەتتىك-تۇرمىستىق ماڭىزداعى نىساندار سالىنعانىن باياندادى.

كاسىپورىندى ودان ءارى دامىتۋ ماقساتىندا «تاۋ-كەن سامۇرىق» اق باسقارما توراعاسى ءماجيت تۇرماعانبەتوۆ پەن ەققدب-نىڭ قازاقستانداعى ديرەكتورى اگريس پرەيمانيس شالقيا كەن ورنىنىڭ تبك قۇرىلىسىن قارجىلاندىرۋ تۋرالى كەلىسىمگە قول قويدى. جوبانى ىسكە اسىرۋ 1,5 مىڭ تۇراقتى جۇمىس ورنىن، ال قۇرىلىس كەزىندە – شامامەن 3 مىڭ جۇمىس ورنىن قۇرۋعا مۇمكىندىك بەرەدى.

جوباعا سايكەس، 2019 جىلدان باستاپ تبك جىل سايىن 2 ملن تونناعا دەيىن مىرىش كەنىن وڭدەي الادى، ال 2020 جىلدىڭ سوڭىنا قاراي تولىق جوبالىق قۋاتىنا – جىلىنا 4 ملن تونناعا دەيىن شىعادى. كومبينات جەرگىلىكتى جانە شەتەلدىك مەتاللۋرگيا زاۋىتتارىنا قورعاسىن كونتسەنتراتىن جەتكىزەتىن بولادى.

وزىق تسيفرلىق تەحنولوگيالاردى قولدانۋ جانە كەندى بايىتۋ بويىنشا وندىرىستىك پروتسەستەردى اۆتوماتتاندىرۋ شىعارىلاتىن ءونىمنىڭ جوعارى ساپاسى مەن باسەكەگە قابىلەتتىلىگىن قامتاماسىز ەتەدى. كاسىپورىندا «تسيفرلىق كەنىش» جوباسى ەنگىزىلەدى جانە ەنەرگيا ءتيىمدى جابدىق قولدانىلادى.

“The Qazaq Times”