فوتو: ckp.in.ua

قر پارلامەنتى سەناتورلارى پلەنارلى وتىرىستا "ەلەكتروەنەرگەتيكا ماسەلەلەرى بويىنشا  قر-نىڭ كەيبىر زاڭ اكتىلەرىنە وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن قابىلدادى. مۇندا وڭىرلىك ەلەكتر جەلى كومپانيالارىن شوعىرلاندىرۋ جانە ولاردى كورپوراتيۆتىك تابىس سالىعىنان جانە مۇلىك سالعىنان بوساتۋ قاراستىرىلعان، دەپ حابارلادى  قر ەنەرگەتيكا ءمينيسترى قانات بوزىمباەۆ.

ءمينيستردىڭ سوزىنشە، رەفورمالار قورىتىندىسىنا سايكەس، ەنەرگەتيكالىق سەكتورداعى جەكەشەلەندىرۋ پروتسەستەرى جانە  ەلەكتر ەنەرگياسى نارىعىن ليبەرالداندىرۋ ناتيجەسىندە  ەلەكتر ەنەرگياسىن تاراتۋ قىزمەتىمەن اينالىساتىن ۇيىمدار كوپتەپ پايدا بولا باستادى.

"2012 جىلدان باستاپ وسى قىزمەت تۇرلەرىن ليتسەنزيالاۋ جۇزەگە اسىرىلعالى بەرى ولاردىڭ سانى تاعى ءبىرشاما ءوستى. سونىمەن 2012-2017 جىل ارالىعىندا ەنەرگيا تاتارتۋشى ۇيىمداردىڭ سانى 160 كومپانياعا دەيىن جەتتى", - دەدى قانات بوزىمباەۆ.

ۆەدومستۆو باسشىسىنىڭ ايتۋىنشا، زاڭ جوباسىن جاساۋ بارىسىندا بۇل ورتا جانە شاعىن ەنەرگەتيكا ۇيىمدارى مەن يەسىز قالعان ەلەكتر جەلىلەرى پروبلەمالى سۇراقتار تۋىنداعان.

"2019 جىلى ەنەرگيا تاراتۋشى كومپانيالاردىڭ سانى شامامەن 27 بىرلىككە قىسقارادى. كەيبىر وڭىرلەردە يەسىز قالعان، ەشكىمگە قىزمەت كورسەتپەيتىن ۇيىمدار بار. ال بۇل وسى جەلىلەرگە قوسىلعان تۇتىنۋشىلارعا قاۋىپ ءتوندىرۋى مۇمكىن. جەرگىلىكتى اتقارۋشى ورگانداردىڭ اقپاراتىنا سەنسەك، مۇنداي جەلىلەردىڭ اۋماعى 2 351 شاقىرىمدى قۇرايدى. بۇعان قاتىستى ماسەلەلەر كوپتەن بەرى شەشىلمەي كەلەدى", - دەدى مينيستر.

مينيستر وسىعان بايلانىستى  مەملەكەتتىك مۇلىك زاڭىنا وزگەرىستەر ەنگىزۋ ارقىلى زاڭ جوباسىندا يەسىز قالعان ەلەكتر جەلىلەرىن تاراتۋدىڭ مەحانيزمى قارالعانىن اتاپ ءوتتى. سونداي-اق، ەنەرگيا تاراتۋشى ۇيىمداردى كورپوراتيۆتىك تابىس سالىعى مەن مۇلىك سالىعىنان بوساتۋ قاراستىرىلعان. الايدا بۇل وزگەرىس جاڭا سالىق كودەكسىنە بايلانىستى بولادى.

“The Qazaq Times”