اقش جولاۋشىلار تەكسەرىسىنە جاڭا تالاپتار ەنگىزدى

اقش اۋەجايلارداعى تەكسەرۋ شارالارىن قاتاڭداتۋدى قولعا الدى. جاڭا ەرەجەلەرگە اقش-تىڭ ىشكى قاۋىپسىزدىك قىزمەتى ءمينيسترى دجون كەللي قول قويدى.

وزگەرتىلگەن تالاپتارعا سايكەس، ەندى اۋەجاي قىزمەتكەرلەرى مەن جولاۋشىلاردىڭ بارلىق ەلەكتروندى قۇرىلعىلارى سكانەردەن وتكىزىلىپ، جارىلعىش زاتتاردىڭ بار-جوقتىعى ءجىتى تەكسەرىلەدى. ەل قاۋىپسىزدىگىن نىعايتۋدى كوزدەگەن بۇل شارا كۇندەلىكتى اقش-قا ۇشىپ كەلەتىن 2 مىڭ رەيستىڭ 350 مىڭ جولاۋشىسىن قامتىپ، الەمنىڭ 105 ەلىندەگى 280 اۋەجايدا قولعا الىنادى.

اۋە كومپانيالارى اتالعان قاۋىپسىزدىك شارالارىن ءۇش اي ىشىندە قابىلداماسا، اقش ۇكىمەتى ۇشاقتاردا ەلەكتروندى قۇرىلعىلاردى تاسىمالداۋعا تولىقتاي تىيىم سالاتىندىعىن مالىمدەدى. اعىمداعى جىلدىڭ ناۋرىز ايىندا اقش-قا ەگيپەت، ساۋد ارابياسى، كاتار، تۇركيا، كۋۆەيت مەملەكەتتەرىنەن نوۋتبۋك الىپ كەلۋگە تىيىم سالىنعان بولاتىن.

ونان بۇرىن، اقش پرەزيدەنتى دونالد ترامپ-تىڭ 2017 جىلدىڭ 27 قاڭتارىنداعى جارلىعىنا سايكەس، سيريا، يەمەن، سۋدان، ليۆيا، يران، يراك، سومالي مەملەكەتتەرىنىڭ ازاماتتارىنىڭ ەلگە كەلۋىنە توسقاۋىل قويىلىپ، 100 مىڭعا جۋىق ۆيزا جوققا شىعارىلدى.

“The Qazaq Times”