ساۋد ارابياسى باستاعان ەلدەر كاتارعا كەلىسسوز تالاپتارىن قويدى

پارسى شىعاناعى ەلدەرى كاتارعا قاراتقان داعدارىستى توقتاتۋ ءۇشىن دوحاعا رەسمي تۇردە وز تالاپتارىن جولدادى. بۇل تالاپتاردىڭ اراسىندا «ءال-جازيرا» ارناسىن جابۋ جانە تۇركيانىڭ اسكەري بازالارىن ەلدەن شىعارۋ، «مۇسىلمان باۋىرلار» ۇيىمىمەن بولعان بايلانىستى توقتاتۋ، يرانمەن قاتىناستى ازايتۋ قاتارلى تالاپتار بار. بۇل تۋرالى BBC ارناسىنىڭ رەسمي سايتى حابارلايدى.

شىعاناق ەلدەرى. فوتو: BBC.

5 ماۋسىمدا ساۋد ارابياسى باستاعان اراب ەلدەرى كاتارعا ديپلوماتيالىق سانكتسيا سالىپ، كاتار داعدارىسىن ورناتقان بولاتىن. سۋ، قۇرلىق، اۋە جولدارىن كەسىپ تاستاپ، شاعىن عانا تۇبەككە ورنالاسقان كوپ باعىتتى ديپلوماتيالىق قاتىناستاعى كاتارعا ەكونوميكالىق سانكتسيادا سالدى.

كاتار داعدارىسى شىعاناق جاعالاۋى ەلدەرىنىڭ كەڭەسىندە، كەلىسسوزدەر جۇرگىزۋ ارقىلى شەشىم تابادى دەپ كۇتىلگەن. وسى اپتانىڭ باسىندا اقش مەملەكەتتىك حاتشىسى رەكس تيللەرسون ساۋد ارابياسى باستاعان ەلدەردىڭ كەلىسسوز تالاپتارىن قويماي وتىرعانىنا تاڭقالىس بىلدىرگەن ەدى.

ەندى مىنە كاتار داعدارىسىن تۋدىرعان ەلدەر ءوز تالابىن قويدى. الايدا وسىعان دەيىن كاتار جاعى «ءال-جازيرا» ارناسىنىڭ بولاشاعى كاتاردىڭ ىشكى ىسىنە جاتاتىنىن مالىمدەپ، بۇل كەلىسسوز تالابىنا كىرمەيتىنىن ەسكەرتكەن. ال، كاتارداعى تۇركيا اسكەري بازالارى تۋرالى تۇرىك ەلى حابارلاما جاريالاپ، كاتارمەن اسكەري ىنتىماقتاستىق، شىعاناق ورنىقتىلىعىن ساقتاۋ تۋرالى قاتارلى ىستەر ءۇشىن كاتاردا تۇرىك اسكەرلەرى بولاتىنىن ايتقان.

ساۋد ارابياسى باستاعان ەلدەر «ءال-جازيرا» ارناسىنىڭ وپپوزيتسيا ءۇنى رەتىندە، ايماقتاعى ىقپالىنىڭ ارتىپ بارا جاتقانىن اشىق ايتتى. ساراپشىلاردىڭ ويىنشا، كاتار بۇل ايتىلعان تالاپتارعا كەلىسىم بەرە المايدى. سوندىقتان دا ديپلوماتيالىق داعدارىس جالعاسىن تابا بەرەدى دەپ وتىر.

“The Qazaq Times”