قاراعاندى وبلىسىنىڭ ءۇش اۋىلىندا 96 ءىرى قارا مال قىرىلعان بولاتىن. زەرتحاناداعى ساراپتاما ناتيجەسىنە سايكەس  پاستەرەللەز دياگنوزى راستالدى دەپ حابارلايدى «قازاقپارات» حاا.

«وبلىستىق ۆەتەرينارلىق زەرتحانا مال پاستەرەللەزبەن اۋىرعانى جايلى بەرىلگەن قورىتىندىدا بۇل اۋرۋعا ءىرى قاراداعى جەم-ءشوپتى جۇتۋ جولدارىنىڭ اسقىنۋى، جارا، سوزىلمالى سىلەكەي بەلگىلەرى ءتان. بۇگىندە ءولىم-ءجىتىم توقتادى. 319 مالدىڭ 87-ءسى ىندەتتەن تولىقتاي ايىققان»، - دەدى، اۋىل شارۋاشىلىعى مينيسترلىگىنىڭ ۆەتەرينارلىق قاداعالاۋ جانە باقىلاۋ كوميتەتى  وبلىستىق اۋماقتىق ينسپەكتسيا باسشىسى مارات مۇقتاروۆ ارنايى ۇيىمداستىرىلعان بريفينگتە.

نۇرا اۋدانىنىڭ اكىمى نيقانباي ومارحانوۆتىڭ ايتۋىنشا: «اۋرۋ جايىلعان جوق، بىراق جاعداي ازىرگە تۇراقتالدى. ۆەتەرينارلىق شارالار جۇرگىزىلۋدە. مالدار قارالىپ، قاجەتتى پرەپاراتتارمەن ەمدەۋ جۇمىستارى جاتىر».

نۇرا اۋدانىندا پاستەرەللەزدەن مال جاپپاي قىرىلىپ،  تج رەجيمى ەنگىزىلگەن ەدى.

“The Qazaq Times”