قازاقستان سىرتقا ەت ساتا الماي وتىر

قازاقستان ەتىنىڭ سىرتقى نارىقتاعى ۇلەسى قۇلدىراپ جاتىر. بيىلعى جىلدىڭ 1 توقسانىندا 2016 جىلدىڭ العاشقى ايلارىنا قاراعاندا ەت جانە ەت ونىمدەرىنىڭ ەكسپورتى 45%-عا ازايعان. 2017 جىلدىڭ قاڭتار-ناۋرىز ايىندا شەتەلگە بار بولعانى 1,6 مىڭ توننا ەت ساتىلعان، دەپ حابارلايدى  ranking.kz اگەنتتىگى. 

ساتىلىم دەڭگەيىنىڭ تومەندەۋى قازاقستاندىق وندىرۋشىلەردىڭ باعانى كوتەرۋىمەن بايلانىستى. ياعني سىرتتان ساتىپ الۋشىلار ءۇشىن قازاقستاندىق ەتتىڭ باعاسى  35%-عا قىمباتتاعان. وسىلايشا ەت ەكسپورتىنان تۇسكەن ءتۇسىم 1 توقساندا 25%-عا قىسقارعان جانە 3,1 ملن دوللار بولدى.

قازاقستاننان ەڭ كوپ ەتتى ساتىپ الاتىن ەل - كورشى رەسەي. جالپى ءتورت ايدا ەكسپورتتالعان ەتتىڭ 94,5%- نەمەسە 1,5 مىڭ تونناسى وسى ەلگە جەتكىزىلگەن. ال 2016 جىلى بۇل كورسەتكىش 70%-دى قۇراعان.

الايدا، رەسەي نارىعىندا دا قازاقستاندىق ەتتىڭ ساتىلىمى قۇلدىراپ جاتىر. وتكەن جىلمەن سالىستىرعاندا بيىل 4 ايدا ەت  15%-عا از ساتىلعان.

باسقا باعىتتارعا دا ەكسپورت مۇلدە تومەندەپ كەتكەن. مىسالى تاجىكستانعا جەتكىزىلەتىن ەت كولەمى 6 ەسەگە قىسقارسا، قىتاي، قىرعىزستان، وزبەكستان بىردە ءبىر توننا ەت ساتىپ الماعان.

ال قازاقستاندىق تۇتىنۋشىلار 2017 جىلدىڭ ءتورت ايىندا بار بولعانى 229,6 مىڭ توننا ەت ساتىپ العان. ونىڭ ىشىندە قۇس ەتى دە بار.

ايتا كەتەيىك، 2011 جىلى ءىرى قارا مالدىڭ ەتىنىڭ ەكسپورتىن دامىتۋ جوباسى قابىلدانعان. جوبانى جۇزەگە اسىرۋ مەرزىمى 2011-2015 جىلدار بولعان. وسى جوبا قازاقستاننىڭ ەت ەكسپورتىن 2016 جىلى 60 مىڭ تونناعا، ال كەيىنگى 5 جىلدا 180 مىڭ تونناعا دەيىن ارتتىرۋعا مۇمكىندىك بەرەدى دەپ جوسپارلانعان ەدى.

دەگەنمەن قازاقستان 2016 جىلى 60 مىڭ توننانىڭ بەستەن ءبىر بولىگىن، ياعني 12 مىڭ توننا عانا ەت ەكسپورتتادى.

“The Qazaq Times”