اۋىلدىق جەردە شاعىن كاسىپكەرلىك ءۇشىن نەسيەگە قول جەتكىزۋ قيىن

اۋىلدىق جەردە شاعىن كاسىپكەرلىك ءۇشىن قارجىلىق رەسۋرستارعا قول جەتكىزۋ قيىن. بۇل تۋرالى سولتۇستىك قازاقستان وبلىسىنىڭ كاسىپكەرلەرى «اتامەكەن» قر ۇكپ تورالقا توراعاسى تيمۋر قۇلىباەۆپەن كەزدەسۋ كەزىندە مالىمدەدى، دەپ حابارلايدى كاسىپكەرلەر پالاتاسىنىڭ ءباسپاسوز قىزمەتى. 

قازىرگى تاڭدا وبلىستا اۋىلدىق جەردەگى كاسىپكەرلىكتى قارجىلاندىرۋ ءۇشىن 19 ميكرونەسيەلىك ۇيىم مەن 13 اۋىلدىق نەسيەلىك سەرىكتەستىك جۇمىس ىستەيدى ەكەن. الايدا، كاسىپكەرلەردىڭ ايتۋىنشا، بۇل نەسيەلىك ۇيىمداردا ءبىرشاما ولقىلىق بار: قىسقا مەرزىمدى نەسيەنىڭ سىياقى مولشەرلەمەسى جوعارى جانە سەرىكتەستىك قاتىسۋشىلارى مەن اۋىل شارۋاشىلىعى جوبالارىن عانا قارجىلاندىرادى. وسى سەبەپتى كاسىپكەرلەر «اتامەكەن» ۇلتتىق كاسىپكەرلەر پالاتاسىنىڭ ميكرونەسيەلەۋ بويىنشا تاجىريبەسىن سولتۇستىك قازاقستانعا دا ەنگىزۋدى ۇسىندى. تيمۋر قۇلىباەۆ بۇل باستاماعا قولداۋ بىلدىرگەن.

«بىلتىر التى وبلىستا پيلوتتىق جوبانى ۇيىمداستىردىق. ناتيجەسى كوڭىل قۋانتارلىقتاي. بارلىعى دا جاقسى جۇمىس ىستەۋدە. وبلىستا وسىمدىك جانە مال شارۋاشىلىقتارى بار، قاجەتتى قۇرالداردىڭ بارلىعى دا ورىن العان. سوندىقتان بۇل تاجىريبەنى قاراستىرۋ قاجەت. اكىمدىكتەردىڭ ميكرونەسيەلىك ۇيىمداردا قور قۇرۋىنا رۇقسات بەرۋى ءۇشىن قر ۇكىمەتىنىڭ وتىرىسىندا بۇل ماسەلەنى تالقىلايمىز. سوندا سىزدەردە قاراجات قورى پايدا بولادى»، ­– دەدى تورالقا توراعاسى.

ايتا كەتەيىك، بۇعان دەيىن تيمۋر قۇلىباەۆ بيزنەس پروبلەمالارعا تاپ بولىپ جاتسا، شۇعىل ارەكەت جاساۋىمىز كەرەك دەپ مالىمدەگەن. ونىڭ سوزىنشە، بيزنەس قوعامداستىقپەن بىرلەسە وتىرىپ، وتاندىق كاسىپكەرلەردى ءتيىمدى قولداۋ شارالارى ازىرلەنبەك.

“The Qazaq Times”