جاڭا جىل ءتۇنى. اسپاندى قاق تىلە، زۋىلداي اتىلعان وت-وقتار، شاتىرلاعان، تارسىلداعان سۇراپىل داۋىس  شىعارۋدا. توڭىرەك ءزىل-زالا. ماشينالار بەزەكتەپ، يتتەر قىڭسىلاي قاشىپ، قۇستار تۇنگى قوناعىنان شوشىنا ۇشىپ بارادى. وت شاشۋ ونىمەن توقتار ەمەس، تۋرا كوك اسپاننىڭ جۇرەگىنە قادالماي تىنبايتىنداي، زارلەنە ۇشىپ، اسپاندا شىتىرلاي، بىتىرلاي جارىلىپ، جىلاننىڭ تىلىندەي وت ۇشقىندارىن ۇزبەي شاشۋدا.

تەرەزەدەن قاراپ تۇرعان ءتورت-بەس جاس شاماسىنداعى ۇل بالا شەشەسىنە ۇرەيلەنە ءتىل قاتتى:

  • ماما، قۇداي ءولىپ قالماسىن...

اسپانعا اتىلىپ جاتقان وسىنشا وت قۇدايعا ءتيىپ، ءولىپ قالا ما دەگەن سابيلىك قورقىنىشى بۇل.

شاتىرلاعان داۋىس ۇزىلەر ەمەس. دالا كوك ءتۇتىن، اۋا قوڭىرسىق يىسكە تولى. اپپاق قاردىڭ ۇستىندە قوبىراعان پيروتەحنيكا قاعازدارى، قوراپشالارى قارايىپ قالىپ جاتىر. ونى ەلەيتىن ەشكىم جوق. ەلىرە، ەسىرە وت-وق تۇتاتىپ، اسپانعا قاراپ ايقايلاپ، شاتتانا قول شاپالاقتاپ، وزدەرىنشە قۋانىش تاپقان ادامدار.

«قۇداي ءولىپ قالماسىن» دەگەن وي ولاردىڭ ساناسىنا كىرىپ-شىقپاعان دا بولار. ءيا، قۇدىرەتى كۇشتى قۇداي، شەتسىز-شەكسىز الەمدى مەكەن ەتكەن كوك ءتاڭىر ولمەيتىنى انىق. بىراق، ول الگىندەي ادامداردىڭ كوڭىل تۇكپىرىنەن، جۇرەك تورىنەن اسىعا شىعىپ، باياعىدا الىستاپ كەتكەن بولۋى كەرەك.

بالانىڭ اناسى ويلانىپ قالدى. جاڭا عانا ەلدىڭ بارلىق ارناسىنان حالىققا شاراپ تولى بوكالىن جالاڭداتقان ەل باسشىسىنىڭ بەينەسى ەلەستەدى. ەندى سول كوك جاشىكتە كۇلەگەش ءانشى، ءبيشى ويناق سالىپ جاتىر. «حالىقتىق» اتالىپ، «اقتاۋشىلارى» دايىن تۇراتىن مەرەكەنىڭ ادامدارعا سىيلارى نە ەكەن؟ كولكىگەن شاراپ، داۋرىققان توپ، شاتىرلاعان وتتان ءلاززات الۋ ما؟ قانداي تاعىلىمى، قانداي قاسيەتى بار ەدى؟ كىمنەن قالعان “مۇرا” ەدى؟ ەسىن بىلمەي ەلىرگەن ادامدار اسپانداعى قۇدايعا شاماسى جەتپەسە دە، ءوزى ىشتەرىندەگى «قۇدايىن» ءولتىرىپ جاتقانداي...  ەرتەڭ، ءساليۋتتىڭ وتىنان شىققان كوز، كۇيگەن بەت، جۇلىنعان ساۋساق، توبەلەسكەن دوس، توگىلگەن ار... قۇداي بەتىن ارى قىلسىن، بىراق، قۇدايدى...

«قۇداي ءولىپ قالماسا ەكەن...»

... مەرەكەلەرىڭىزبەن!..

اقتامبەردى اسپان

«The Qazaq Times»