تاشكەنتتە جالاۋ كوتەرگەن ازيا چەمپيوناتى ءبىز ءۇشىن تابىستى وتۋدە. قازاقستان بوكس قۇراماسى كومانداسىمەن شيرەك فينالعا شىقتى.

ءبىر الاڭداتقانى، اۋىر سالماقتاعى بوكسشىلارىمىز ەدى. ۆاسيلي لەۆيتتە ءمىن جوق. ال، اسا اۋىر سالماقتاعى يۆان دىچكونى الماستىرعان جاڭا پەرى قامشىبەك قوڭقاباەۆ ازىرگە سىننان سۇرىنبەي ءوتتى.

قامشىبەك 1/8 كەزدەسۋىندە موڭعوليالىق قانداسىمىز ەربولات تولەكپەن قولعاپ ءتۇيىستىردى. ەربولات تا وسال سپورتشى ەمەس. ايتاقالسىن جەتىستىكتەرگە جەتىپ جۇرگەن جىگىت. الايدا، قامشىبەك ودان ۇستەم شىقتى.

ەكىنشى راۋندتا ەربولات نوكداۋن الدى. ارى قاراي جارىس كوپكە سوزىلعان جوق. قازاقستان بوكسشىسى ايقاستى ۋاقىتىنان بۇرىن اياقتاتىپ، ءۇشىنشى راۋندتا جەڭىسكە جەتتى. وكىنىشتىسى، ەربولات موڭعوليا ۇلتتىق قۇراماسىنا كىرۋ مۇمكىندىگىنەن جانە دە ايىرىلدى. قازاق سپورتشىلارىنا ءاردايىم جەڭىس تىلەيمىز!

"The Qazaq Times"