بۇگىن تالدىقورعان قالاسىنىڭ سوتىندا قاڭتار قىرعىنى كەزىندە ۇستالعانداردى «ازاپتاۋشى» بەس پوليتسەيگە سوت ۇكىمى وقىلدى. 39-وتىرىستا سۋديا بەكمۇرات دۇيسەنبەكوۆ كۇدىكتىلەردىڭ ءبارى قىلمىستىق كودەكستىڭ «ازاپتاۋ» بابىمەن (146-باپتىڭ 2-بولىگى) كىنالى دەپ تانىدى.

سۋديا قاندى قاڭتاردا ۇستالعانداردى «ۇتىك باسىپ، ازاپتادى» دەپ ايىپتالعان ايدىن كەنجاەباەۆ پەن جانباقىت نۇرتازانى 4 جىلعا، ساپارمۇرات توقتاشتى 3.5 جىلعا، الماس بوقانوۆ پەن ەرمەك جۇماشەۆتى 3 جىلعا باس بوستاندىعىنان ايىردى.

سوتتالۋشىلاردىڭ بارلىعىنا ءۇش جىل قۇقىق قورعاۋ جۇيەسىندە جانە مەملەكەتتىك قىزمەتتە جۇمىس ىستەۋگە تىيىم سالىنىپ، ولار شەندەرىنەن ايىرىلدى.

سوتتالۋشىلار ۇكىم جاريالانعان بويدا سوت زالىندا قاماۋعا الىندى. ايدىن كەنجەباەۆتىڭ قاماۋدا بولعان ءبىر كۇنى جازا مەرزىمىنىڭ ءبىر جارىم كۇنىنە، قالعان سوتتالۋشىلاردىڭ ۇيقاماقتا وتىرعان ءبىر كۇنى ەكى تاۋلىككە ەسەپتەلدى.

جەتىسۋ وبلىستىق سوتىنىڭ رەسمي اقپاراتىندا سوتتالۋشىلار ايىبىن تولىق مويىنداعانى، «جابىرلەنۋشىلەر ولاردى كەشىرگەنى» جازىلعان.

بەس ايدان اسا قارالعان «ازاپتاۋ» ىسىنە 23 جابىرلەنۋشى جانە 5 سوتتالۋشى پوليتسەي قاتىستى. جۇما كۇنى سوت ۇكىمى وقىلار الدىن پوليتسەيلەر جابىرلەنۋشىلەردەن كەشىرىم سۇراپ، سوتتان شارتتى جازا سۇراعان.

العاشىندا جابىرلەنۋشىلەر تارابى «ازاپتاۋشى» پوليتسەيلەردەن قوقان-لوقى، قىسىم كورىپ جاتقانىن ايتىپ شاعىنعان ەدى. كەيىن ولارعا كەشىرىم بەرگەنىن، پروتسەسۋالدى كەلىسىمگە كەلەتىنىن مالىمدەگەن.

بيلىك دەرەگىنشە كەمى 238 ادام قازا تاپقان قاڭتار قىرعىنىندا قۇقىق قورعاۋ ورگاندارىنان ازاپ كورگەن جۇزدەگەن ادام ارىز تۇسىرگەن. دەگەنمەن قوزعالعان ءىستىڭ دەرلىگى جابىلىپ قالعان. قۇقىق قورعاۋ ۇيىمدارىنىڭ مالىمەتىنشە، قاڭتاردا ون مىڭنان اسا ادام ۇستالىپ، ونىڭ جەتپىس پايىزى ازاپتالعان. ساراشىلار «جاپپاي ازاپتاۋ ناۋقانى» قۇقىق قورعاۋ ورگاندارىنا قوعامدىق سەنىمدى قاتتى تومەندەتكەنىن ايتادى.

The Qazaq Times