ءبىرمانداتتى وكرۋگتەر بويىنشا ءماجىلىس دەپۋتاتتىعىنا ءوزىن-ءوزى ۇسىنعان 435 ادامنىڭ ءوتىنىشى قابىلداندى. كوميسسيالار 125 ادامدى كانديدات رەتىندە تىركەۋدەن باس تارتقان. قالعان 45 ادام ءوتىنىشىن ءوز ەركىمەن قايتىپ العان. 19 اقپان كۇنى ورتالىق سايلاۋ كوميسسياسىنىڭ وكىلدەرى وسىلاي دەپ مالىمدەدى. بۇعان دەيىن ءماجىلىس سايلاۋىنا ءبىرمانداتتى سايلاۋ وكرۋگتەرى بويىنشا 609 كانديدات ۇسىنىلعانى ايتىلعان ەدى: 525-ءى – ءوزىن-ءوزى ۇسىنعاندار، 84-ءىن ءتۇرلى ۇيىمدار مەن ساياسي پارتيالار ۇسىنعان. بۇل تۋرالى ازاتتىق راديوسى جازدى.

"29 ءبىرمانداتتى وكرۋگتەر بويىنشا 435 كانديدات تىركەلدى. ورتاشا ەسەپپەن العاندا، ءار مانداتقا 15 كانديداتتان تيەدى. ەڭ جوعارى باسەكەلەستىك استاناداعى №1 جانە №2 وكرۋگتەردە بايقالدى: اتالعان وكرۋگتەردە 41 جانە 42 كانديدات تىركەلگەن. الماتىداعى №3, №4, №5 وكرۋگتەردە 37, 33 جانە 34 كانديدات تىركەلگەن. ەڭ تومەن باسەكەلەستىك تۇركىستان وبلىسىنداعى №25 وكرۋگتە – مۇندا 5 كانديدات بار" دەدى ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ. ونىڭ سوزىنەن "ۆلاست" سايتى ءۇزىندى كەلتىردى.

پەتروۆتىڭ ايتۋىنشا، تىركەلگەن 435 كانديداتتىڭ 76-سىن جەتى ساياسي پارتيا ۇسىنعان، ال 359-ى – ءوزىن-ءوزى ۇسىنعاندار. 80 پايىزى – ەر ادام، 20 پايىزى – ايەل. كانديداتتاردىڭ ورتاشا جاسى – 49-50.

وسك وكىلىنىڭ سوزىنە قاراعاندا، 45 كانديدات ءوتىنىشىن ءوز ەركىمەن قايتارىپ العان. 125 كانديدات تىركەۋدەن وتە الماعان: 114-ءى "تىركەۋ قۇجاتىن تولىق بەرمەگەن". "زاڭدا كورسەتىلمەگەن ۋاقىتتا ۇگىت-ناسيحات جۇرگىزگەنى ءۇشىن" تاعى ءبىر ادامنىڭ تىركەۋ تۋرالى ءوتىنىشى ماقۇلدانباعان.

بۇعان دەيىن وسك ءتۇرلى دەڭگەيدەگى ماسليحاتتارعا بارلىعى 12 مىڭعا جۋىق كانديدات ۇسىنىلعانىن حابارلاعان ەدى. 19 اقپاندا وسك ولاردىڭ 10,2 مىڭنان استامى تىركەلگەنىن ايتتى: 61,8 پايىزى – ءوزىن-ءوزى ۇسىنعاندار، 38,2 پايىزىن ساياسي پارتيالار مەن قوعامدىق ۇيىمدار ۇسىنعان. ولار 3081 ورىنعا "تالاسادى". بۇكىل ەلدە 223 ءماسليحات بار.

ءبىر كۇن بۇرىن الماتى قالاسى اۋماقتىق سايلاۋ وكرۋگى ازاماتتىق بەلسەندى ايگەرىم تىلەۋجاندى ءماجىلىس دەپۋتاتتىعىنا ۇمىتكەر رەتىندە تىركەۋدەن باس تارتقان ەدى. سايلاۋ كوميسسياسى ۇمىتكەردىڭ "سايلاۋ جارناسىنىڭ" دۇرىستىعىنا كۇمان كەلتىرگەن. ال جاقتاستارى كوميسسيا قوعامدىق-ساياسي ماسەلەلەرگە پىكىرىن اشىق ايتقان، بيلىكتى سىناپ جۇرگەن بەلسەندىنى تىركەمەۋ ءۇشىن "سىنىقتان سىلتاۋ" ىزدەگەنىن ايتقان. ال كوميسسيا وكىلدەرى مۇنى جوققا شىعاردى.

قازاقستاندا بۇعان دەيىن دە كەي ازاماتتىق بەلسەندىلەر ءماجىلىس جانە ءماسليحات دەپۋتاتتىعىنا ۇمىتكەر رەتىندە تىركەلە المادى.

قازاقستاندا كەزەكتەن تىس ءماجىلىس جانە ءماسليحات سايلاۋى 19 ناۋرىزدا وتەدى. ازاماتتار پارتيا اتىنان يا جەكە كانديدات رەتىندە سايلاۋعا تۇسە الادى. ءبىر كۇن بۇرىن ەلدە كانديداتتاردى تىركەۋ اياقتالىپ، ۇگىت-ناسيحات كەزەڭى باستالعان.

پارلامەنت سايلاۋى قارساڭىندا استانا ارالاس ماجوريتار-پروپورتسيونال جۇيە ەنگىزىلگەنىن العا تارتىپ، سايلاۋ "باسەكە جاعدايىندا وتەدى" دەپ مالىمدەدى. سىنشىلار ساياسي رەجيم وزگەرمەگەنىن، بيلىك ساياسي كۇشتەر اراسىندا شىنايى باسەكەگە جول بەرمەي وتىرعانىن ايتادى. ولاردىڭ پىكىرىنشە، ءبىرمانداتتى وكرۋگتەردە وپپوزيتسيا كانديداتتارى تىركەلسە دە، سايلاۋدى باقىلاۋ مەن داۋىس ساناۋ ءبارىبىر اقوردانىڭ قولىندا.

ورتالىق سايلاۋ كوميسسياسىنىڭ مالىمەتىنشە، ءماجىلىس سايلاۋىنا پارتيالىق ءتىزىم بويىنشا جەتى ساياسي پارتيا اتىنان 281 كانديدات تىركەلگەن.

The Qazaq Times