6 مامىر كەشكە الماتىدا پوليتسيا Oyan, Qazaqstan بەلسەندىلەرى دارحان ءشارىپوۆ پەن ۆلادا ەرمولچەۆانى ۇستاپ اكەتتى. بۇل جونىندە Oyan, Qazaqstan قوزعالىسى تەلەگرام-ارناسىندا حابارلادى، -دەپ جازدى ازاتتىق راديوسى.

قوزعالىستىڭ حابارلاۋىنشا، ولاردى 2022 جىلى قاراشا ايىندا پرەزيدەنت سايلاۋىنا قارسى ميتينگ جاساعانى (488-باپ، 6-بولىك) ءۇشىن ۇستاعان بولۋى مۇمكىن.

سەنبى كۇنى ۆلادا ەرمولچەۆانى المالى اۋداندىق پوليتسياسىنا، دارحان ءشارىپوۆتى بوستاندىق اۋداندىق پوليتسياسىنا اكەتكەن.

"بەيبىت ميتينگىگە شىعۋ قۇقىعىنا كونستيتۋتسيادا كەپىلدىك بەرىلگەن" دەپ جازدى قوزعالىس وكىلدەرى.

پوليتسيا ازىرگە تۇسىنىكتەمە بەرمەدى.

بىلتىر 20 قاراشادا كەزەكتەن تىس پرەزيدەنت سايلاۋى ءوتىپ، ونىڭ رەسمي ناتيجەسى بويىنشا پرەزيدەنت توقاەۆ "جەڭىمپاز اتانعان". حالىقارالىق باقىلاۋشىلار "پرەزيدەنت سايلاۋى باسەكە جوق ساياسي احۋالدا ءوتتى" دەپ مالىمدەگەن.

سايلاۋ قارساڭىندا جانە سايلاۋ كۇنى سايلاۋعا كوزقاراسىن بىلدىرمەك بولعان بەلسەندىلەر قۋدالانعان، تاۋەلسىز باقىلاۋشىلار داۋىس بەرۋ پروتسەسى مەن داۋىستاردى ساناۋ كەزىندە قىسىم جاسالعانىن مالىمدەگەن.

جەرگىلىكتى جانە حالىقارالىق قۇقىق قورعاۋشىلار قازاقستاندا ازاماتتاردىڭ كونستيتۋتسيادا جازىلعان بەيبىت جينالۋ مەن پىكىرىن ايتۋ قۇقىعى ءجيى بۇزىلاتىنىن ايتىپ، سىنايدى.