الماتىدا ءماجىلىس دەپۋتاتتىعىنا ۇمىتكەر بولعان ءبىر توپ بەلسەندى، ساياساتكەرلەر جيىن وتكىزىپ، سايلاۋ ناتيجەسىمەن كەلىسپەيتىندەرىن ايتىپ، «حالىق پارلامەنتى» قۇرىلعانىن جاريالادى. 

24 ناۋرىزدا وتكەن جيىندا الماتى وبلىسىنان ءماجىلىس دەپۋتاتتىعىنا كانديدات بولعان رىسبەك سارسەنبايۇلى وزدەرى قويعان تالاپتاردى ورىنداتۋ ءۇشىن «حالىق پارلامەنتى» قۇرىلعانىن مالىمدەدى. ونىڭ سوزىنشە، ۇيىمعا سايلاۋعا قاتىسىپ، وتپەي قالعان ۇمىتكەرلەر مۇشە بولادى.

– ايتىلعان تالاپتاردى ءبىز ءۇشىن ەشكىم ىسكە اسىرىپ بەرمەيدى. ول ءۇشىن ءبىز «حالىق پارلامەنتىن» قۇراتىن شىعارمىز. وعان وسى سايلاۋعا ۇمىتكەر بولىپ قاتىسقان، حالىق قولداۋ بىلدىرگەن ادامدار، ەلدىڭ اراسىندا بەدەلى بار بەلسەندىلەر دە كىرەدى، – دەدى سارسەنبايۇلى.

الماتىداعى N5 وكرۋگ بويىنشا دەپۋتاتتىققا ۇمىتكەر، ماجىلىسكە وتپەي قالعان كانديدات مۇحتار تايجان جيىندا ايتىلعان بارلىق ۇسىنىسپەن كەلىسەتىنىن ايتىپ، سايلاۋ ناتيجەسىنە قارسى ميتينگكە شىعۋ قاجەتتىگىن مالىمدەدى.

– حالىق بىزدەن ناقتى ارەكەت كۇتەدى. مەن رىسبەك اعا ايتقان ۇسىنىستارمەن تولىعىمەن كەلىسەمىن. بىراق مەنىڭ ويىمشا، ءبىر داتانى بەلگىلەپ، جالپى ۇلتتىق ميتينگ ۇيىمداستىرۋعا اتسالىسۋىمىز كەرەك. البەتتە زاڭدى تۇردە ءبىز ارەكەتتەردى جاساۋىم كەرەك. بىراق حالىق كوشەگە شىقپاي، وكىنىشكە وراي، قۇلاق اساتىن مەملەكەت جوق بىزدە، – دەدى ول.

الماتى قالاسى بويىنشا N3 وكرۋگتەن سايلاۋعا قاتىسىپ، ماجىلىسكە وتپەي قالعان تاعى ءبىر كانديدات ينگا يمانباي وتكەن سايلاۋدىڭ ناتيجەسىن جوققا شىعارۋ كەرەكتىگىن ايتتى. ونىڭ سوزىنشە، بيلىك جالعان وپپوزيتسيا وكىلدەرىن سايلاۋعا قاتىستىرۋ ارقىلى باتىس ەلدەرىنە ساياسي باسەكە مەن ءادىل سايلاۋدىڭ يميتاتسياسىن جاساعان.

 – «جاڭا قازاقستان»، «ادىلەتتى قازاقستان» دەيدى، وندا بۇعان دەيىنگى سايلاۋلاردان ايىرماشىلىعى قانداي؟ قازىر پسەۆدووپپوزيتسيونەرلەردى باتىسقا، حالىقارالىق ۇيىمدارعا ساتادى. «سەندەر ينگا وتپەدى دەمەڭدەر، بۇندا دا وپپوزيتسيا ءوتتى» دەپ ساتادى. ساتۋ ءۇشىن ولاردى جارىسقا قوستى. ساتۋ ءۇشىن اكىمشىلىك ولارعا اكىمشىلىك ۇگىت-ناسيحات جۇرگىزدى، – دەدى يمانباي.

قازاقستاندا ءماجىلىس پەن ءماسليحات سايلاۋى 19 ناۋرىزدا وتكەن. سول ۋاقىتتان بەرى سايلاۋ توڭىرەگىندەگى داۋ باسىلعان جوق. ءوزىن-ءوزى ۇسىنىپ، سايلاۋدان وتپەي قالعان تاۋەلسىز كانديداتتار سايلاۋ ناتيجەسىمەن كەلىسپەيدى. ولار داۋىس ۇرلاۋ، باقىلاۋشىلاردى ۋچاسكەدەن شىعارىپ جىبەرۋ، حاتتاما بەرمەۋ، پوليتسيا شاقىرتۋ سياقتى زاڭ بۇزۋشىلىقتار بولعانىن ايتۋدا.

بيىلعى سايلاۋ ەسكى دە جاڭا جۇيە – 30 پايىز ماجوريتار، 70 پايىز پارتيالىق ءتىزىم بويىنشا وتكەن. سايلاۋ وتپەي تۇرىپ، تاۋەلسىز ساراپشىلار بۇنى ساياسي باسەكە مەن دەموكراتيانىڭ يميتاتسياسى دەپ باعالاعان.