ءماجىلىس دەپۋتات ەرمۇرات باپي ءماجىلىس وتىرسىندا رەسەيدى سىناپ، سوتتالعان ەكى بەلسەندى دانات نامازباەۆ پەن مارعۇلان بورانباەۆتىڭ ءىسىن قايتا قاراۋ قاجەتتىگىن ايتىپ، باس پروكۋرور بەرىك اسىلوۆقا دەپۋتاتتىق ساۋال جولدادى. بۇل تۋرالى ماسا مەديا جازدى.

– ءبىزدىڭ ەلدىڭ نامىسىن قورعاعان، ۇتجاندى ازاماتتار مارعۇلان بورانباەۆ پەن دانات نامازباەۆ «ۇلتارالىق ارازدىقتى قوزدىردى» دەگەن جەلەۋمەن، ارقايسىسى بەس جىلدان سوتتالىپ كەتتى. بۇل قاتاردا ەرمەك نارىمباەۆتى دا اتاۋعا بولادى... حالىقارالىق ۇيىمدار بۇل ازاماتتار «ساياسي تۇتقىندار» تىزىمىنە ەنگىزگەن. بىزگە بۇل كەرەك پە؟ ەندەشە، بۇعان دەيىن قازاقستاندا بولىپ كەلگەن سەپاراتيزم سيندرومىن، جۋىقتا پەتروپاۆل قالاسىندا بولعان جىكشىلدەنۋدىڭ جيىركەنىشتى جاعداياتىن ەسكەرە وتىرىپ، دانات نامازباەۆ پەن مارعۇلان بورانباەۆتىڭ ۇكىمىن قايتا قارايتىن ۋاقىت تا، ساياسي سەبەپ تە، ۇلتتىق قاۋىپسىزدىك مۇقتاجدىعى تۋدى دەپ ەسەپتەيمىن، – دەدى باپي باس پروكۋرورعا جولداعان دەپۋتاتتىق ساۋالىندا.

ساياسي بەلسەندىلەر دانات نامازباەۆ پەن مارعۇلان بورانباەۆ «ۇلتارالىق الاۋىزدىق تۋدىردى» دەپ ايىپتالىپ، بىلتىر 5 جىلعا سوتتالعان. ەكى بەلسەندى جەلىدە رەسەيلىك شەنەۋنىكتەردىڭ قازاقستان جايلى ايتقان سىندارىنا قارسى پىكىر ءبىلدىرىپ، قازاقستاننىڭ رەسەيمەن ينتەگراتسياسىنا قارسى شىققان جانە رەسەيدىڭ ۋكرايناعا باسقىنشىلىعىن سىناعان ەدى.