جۋرناليست ەگەۋباەۆانىڭ بالاسىن بەلگىسىز بىرەۋ تاپانشامەن قورقىتقان

جۋرناليست دينارا ەگەۋباەۆا بالاسىنا بەلگىسىز بىرەۋ تاپانشا كەزەنگەنىن حابارلادى. بۇل جونىندە ول instagram جەلەسىندە جازدى.

– مەنىڭ ۇلىما تاپانشامەن شابۋىل جاسادى. ول ەۋرووداق ازاماتى. توقاەۆ، حالىقارالىق داۋ بولعانىن قالايسىڭ با؟ يتتەرىڭدى بايلاۋدا ۇستا، – دەپ جازدى ەگەۋباەۆا 6 اقپاندا.

14 قاڭتاردا ءجۋرناليستىڭ اۆتوكولىگىن بەلگىسىز بىرەۋلەر ورتەپ كەتكەن. ەگەۋباەۆا بۇنى «ومىرىمە جاسالعان قاستاندىق» دەپ باعالاعان.

– سالوننىڭ ىشىندە كىرپىش جاتىر. ونى كولىكتىڭ ارتقى اينەگىنەن لاقتىرعان. مەن ەسەڭگىرەپ قالدىم... كولىك اۋلادا تۇر. ونىڭ جانىندا وزگە كولىكتەر تۇر. جارىلىس بولۋى مۇمكىن ەدى. وتە ۇلكەن. وندا ءبىرىنشى قاباتتا تۇراتىن ادامدار قازا تابۋى مۇمكىن ەدى. ولاردىڭ نە ىستەپ جاتقانىن تۇسىنەسىزدەر مە؟ پوليتسيا، ءورت سوندىرۋشىلەر كەلدى... بۇل توقاەۆتىڭ «جاڭا قازاقستانى»، – دەگەن ول.

دينارا ەگەۋباەۆا قاڭتار وقيعاسى كەزىندە ازاپتالعاندار مەن وققا ۇشىپ، قازا تاپقانداردىڭ تۋىستارىنان سۇحبات الىپ، حابار تاراتىپ كەلەدى. جاقىندا پارلامەنت سايلاۋىنا ماجوريتارلىق جۇيە بويىنشا كانديداتۋراسىن ۇسىنعان. ونىڭ جاقتاستارى جۋرناليسكە جاسالىپ جاتقان قىسىمداردى سايلاۋمەن بايلانىستىرادى.

دينارا ەگەۋباەۆا ءار جىلدارى «كتك»، «31»، «حابار»، «نتۆ» (رەسەيلىك), «ناستوياششەە ۆرەميا ازيا»  تەلەارنالارىندا جۇمىس ىستەگەن.