بۇگىن 6 قاڭتار تالدىقورعان قالاسىندا قاندى قاڭتار كەزىندە ۇستالعاندارعا ۇتىك باسىپ ازاپتادى دەپ ايىپتالعان ايدىن كەنجەباەۆ جاۋاپ بەردى. سوت باستالعاندا كۇدىكتى ايدىن كەنجەباەۆتىڭ ادۆوكاتى ەسەيبەكوۆ رۋسلان پروكۋراتۋراعا كىنانى موينداۋ تۋرالى پروسەستىك كەلسىم ءوتىنىش حاتىن ۇسىندى. سۋديا بەكمۇرات دۇيسەنبەكوۆ ءوتىنىشتى اشىق قالتىردى.

اتاۋلى ىستەگى ايىپتاردىڭ بارلىعىمەن كەلىسەمىن دەگەن ايدىن كەنجەباەۆ: "جازىلعان ايىپتاۋ اكتىسىمەن تولىقتاي كەلىسەمىن. كىنامدى مويىندايمىن. جابىرلەنۋشىلەردىڭ بارىنەن كەشىرىم سۇرايمىن",-دەدى.

جابىرلەنۋشى داۋرەن ايتوۆ كەنجەباەۆتان  جانىڭداعى باسقا ازاپتاعان پوليتسەيلەر تۋرالى سۇرادى.

ايدىن كەنجەباەۆ "مەن ولاردى بىلمەيمىن. تانمايمىن. بارلىعى ماسكادا بولدى", -دەپ جاۋاپ بەردى.

جابىرەنۋشى تاراپتىڭ ادۆوكاتى ءتۇسىپوۆا اسەمنىڭ "الدىن الا ءسوز بايلاسۋى تۋرالى جانە وسىندا ازاپتاۋ فاكتىسىمەن وتىرعان باسقا پوليتسيا قىزمەتكەرلەرىن تانيسىز با" دەگەن سۇراعىنا كۇدىكتى كەنجەباەۆتان "مەن ايىپتاۋ اكتىسىمەن تولىقتاي كەلىسەمىن. وندا جازىلعانداردىڭ بارلىعى راس، نۇرتازا جانباقىتتان باسقاسىن تانىمايمىن" دەدى.

ۇستالعانداردى نە ءۇشىن ازاپتادىڭ دەگەن ساۋالعا "جيىرما مىڭ تەرروريست كىردى دەگەن اقپارتتى ەستىگەن سوڭ ۇرەي بولدى. جوعالعان قارۋلاردى ورنىنا قويۋ ماساتىندا ازاپتادىم. مەن ونىڭ ءبارىن قارا باسىم ءۇشىن ىستەگەم جوق. ازاپتاۋ تۋرالى بۇيرىق بولمادى. بىراق قارۋلاردى تاۋىپ قالادا تىنىشتىق ورناتۋ تۋرالى بۇيرىق بولدى"-دەگەن جاۋاپ بەردى.

ادۆوكات ءتۇسىپوۆانىڭ تاعىدا "تەرگەۋ كەزىندە موينداماي، قازىر موينداپ تۇرعانىڭىزدىڭ قانداي سەبەبى بار" دەگەن سۇراعىنا كۇدىكتى ايدىن كەنجەباەۆ "مەن ول كەزدە قورعانۋ قۇقىمدى پايدالاندىم" دەدى.

ايدىننىڭ سۇرالۋى ۇزاققا سوزىلمادى. ارى قاراي كۇدىكتى پوليتسەيلەردىڭ ادۆوكاتتارى سۋدياعا وزدەرىنە قاتىستى جابىرلەنۋشىلەردىڭ كەشىرىم ارىزدارىن تاپسىردى. سوت ءىستى زەردەلەۋگە كوشتى.

سۋديا دۇيسەنبەكوۆ جۋرناليستەرگە دىبىس-بەينە جازۋعا، ايىپتالۋشىلاردى فوتوعا تۇسىرۋگە شەكتەۋ قويعان.