الماتى وبلىسى، تالعار اۋدانى، الاتاۋ اۋىلدىق وكرۋگىندەگى قىزىلقايرات اۋىلى وسى وكرۋگتەگى ەڭ ۇلكەن اۋىل. قىزىلقايراتتىڭ تۇمەنگى كوشەلەرىنەن كەيىن "بولاشاق", "كەلەشەك" اتاۋىمەن بوي كوتەرگەن جاڭا قونىستىڭ تۇرعىندارى كەلەشەگىنەن الاڭداپ، بولاشاعىنا سەنىمسىزدىكپەن قارايدى.

جول، توك، سۋ سياقتى تىرشىلىكتىڭ قان تامىرىنا اينالعان ينفراقۇرلىم بۇل جاقتا وتكەن عاسىردىڭ ورتاسىنداعى احۋالدان دا تومەنرەك. ايتا ءسوز بولعانىمەن تىڭدار قۇلاق تاپپاعان جۇرت  22 ماۋسىم كۇنى اكىم قارالارعا ارىزدارىن تىڭداتا الماعان سوڭ، باق وكىلدەرىنەن كومەك سۇراعان.

جۇرتتىڭ جان داۋسىن جاي كۇندەرى تىڭداي قويمايتىن اكىم قارالار ءتۇسىرىلىم توبى كەلە سالىسىمەن ۋاعدالارىن ءۇيىپ تۇگىپ جۇرت اراسىنا جەتتى.

اكىمگە تالاپ، تىلەكتەرىن ايتقىسى كەلگەن جۇرت، وسىعان دەيىن اكىمشىلىككە قانشا بارسا دا اكىمدى كەزدەستىرە الماعان، سول سەبەپتى باق قۇرالدارىن شاقىرۋعا ءماجبۇر بولعان. قوردالانعان ماسەلەلەر شەشىمىن تاپپاق تۇگىلى، ەستىر قۇلاق بولماعاندىقتان، حالىقتىڭ اشۋ-ىزاسىن تۋدىرعان، بەس-التى مارتە جازباشا ءوتىنىش بەرىلگەنمەن، وعان دا جاۋاپ بولماعان.
مۇنداعى ەلدىڭ ەڭ باستى ماسەلەلەرى سۋ قۇبىرلارىنىڭ ۇنەمى جارىلاتىنى، جارىقتىڭ جەكە مەنشىك ترانسفورماتورمەن جالعانىپ تاراتىلاتىنى، ونىڭ ءوزى 70 ۇيگە ارنالعان ترانسفورماتورمەن 500 ءۇيدى جارىقتاندىراتىندىقتان ۇنەمى ءوشىپ قالاتىنىن ايتادى. جوندەۋ كورمەگەن جولدىڭ زاردابىن تارتىپ شارشاعان ەلدىڭ قيىنشىلىعى كوپ كورىنەدى، جەدەل جاردەم كەلمەيدى، تاكسيلەر قىمبات سۇرايدى، بولماسا كەلۋدەن باس تارتادى. مەكتەپ وقۋشىلارى جاڭبىرلى كۇندەرى لايساڭنان اياق الىپ جۇرە المايدى، ال جازدا بورپىلداق توپىراقتان شاڭ قاۋىپ جۇرگەندەرىن جارىسا ايتىپ جاتتى.

اۋىل اكىمى ازامات سەيتوۆ باق وكىلدەرىنىڭ الدىندا جۇرتقا ءبىراز ۋاعداسىن بەرىپ تارقاستى.

الايدا،  جارىلعان قۇبىردى جاماۋعا تراكتور جىبەردىم دەگەن اكىم ءسوزى وتىرىك بولىپ شىقتى. كەلەشەكتەگى جارىق قۇبىردىڭ سۋى ءالى سىرتقا اعىپ جاتىر.

ءنۇرباتيما بايتۇرسىن

تالعار اۋدانى