قاۋىپسىزدىك كەڭەسىندەگى قايشىلىق.، فوتو: BBC

جاھاندىق گەوساياسي جاعداي تاعى ءبىر كۇردەلى كەزەڭگە ءوتتى. رەسەي پرەزيدەنتى ۆلاديمير پۋتين ۋكراينا شىعىسىنداعى وزدەرىن لۋگانسك جانە دونەتسك «حالىق رەسپۋبليكاسى» دەپ اتاعان ايماقتاردىڭ دەربەستىگىن مويىندادى. ءارى، اتالعان «ەلدەردىڭ» قاۋىپسىزدىگىن قامتاماسىز ەتۋ ءۇشىن اسكەر كىرگىزەتىنىن مالىمدەدى. كرەمل بۇل شەشىمى تالايدان ايتىلىپ كەلگەن سوعىس قاۋپىن ەڭ جوعارى شەككە جەتكىزدى.

جاعدايعا بايلانىستى ۋكراينا بۇۇ قاۋىپسىزدىك كەڭەسىن شۇعىل وتىرىس وتكىزۋگە شاقىردى. ال بۇۇ-داعى رەسەي وكىلدەرى بولسا دونەتسك پەن لۋگانسكتىڭ دەربەستىگىن تانۋعا قارسى شىققانداردى ايىپتاپ جاتىر.

ماسكەۋدىڭ بۇل ارەكەتىنە ۋكراينا پرەزيدەنتى ۆلاديمير زەلەنسكي «مينسك كەلىسىمىنەن ءبىر تاراپتى شىعىپ كەتۋ» جانە «نورمان تورتتىگى» كەلىسسوزدەرىنىڭ شەشىمدەرىن سىيلاماۋ دەپ باعالادى. ءارى ول: «ءبىز ەشنارسەدەن جانە ەشكىمنەن قورىقپايمىز. ەشكىمگە ەشنارسەگە مىندەتتى ەمەسپىز جانە ەشكىمگە ەشنارسە بەرمەيمىز»، – دەپ مالىمدەمە جاسادى.

رەسەيدىڭ ۆاسيلي نەبەنزيا (رەسەيدىڭ بۇۇ-داعى وكىلى) دنر مەن لنر-ءدىڭ دەربەستىگىن تانۋ مينسك كەلىسىمىن بۇزعان بولىپ سانالمايدى دەپ تە مالىمدەدى. ونىڭ ايتۋىنشا قازىرگى باستى ماسەلە سوعىستى قايتىپ بولدىرماۋ جانە ۋكراينانىڭ اتالعان «رەسپۋبليكالارعا» قارسى ارانداتۋ ارەكەتتەرىن توقتاتۋ ماڭىزدى سانالادى ەكەن.

قازىردىڭ وزىندە بۇۇ قاۋىپسىزدىك كەڭەسىندە ۇلكەن قايشىلىق بولىپ جاتقانى ءمالىم. وندا ۋكراينا مەن رەسەيدىڭ بۇۇ-داعى ارناي وكىلدەرى قايىم ايتىسقا ءتۇستى.

ءپۋتيننىڭ كەزەكتى ارەكەتىنە قارسى اقش پرەزيدەنتى جو بايدەن سانكتسيا شەشىمدەرىنە قول قويعانى ايتىلدى. الايدا، ونىڭ ءباسپاسوز وكىلى پساكيدىڭ ايتۋىنشا سانكتسيا لۋگانسك پەن دونەتسك جەرلەرىنە ينۆەستيتسيا سالۋ جانە قارجى اۋدارۋعا قارسى شەكتەۋلەرگە نەگىزدەلگەن.

دەگەنمەن، بۇۇ-داعى اقش وكىلى «ەرتەڭنەن باستاپ حالىقارالىق قۇقىقتى اشىق بۇزعانى ءۇشىن اقش رەسەيگە قارسى سانكتسيا كىرگىزەدى»، – دەپ مالىمدەدى. مالىمەتتەرگە ساي، بۇل سانكتسيا اقش-تىڭ دەربەس شەكتەۋلەرى سانالادى، بۇل وزگە باتىس ەلدەرىنىڭ ورتاق قادامدارىنان بولەك شەكتەۋ شارالارىن جۇزەگە اسىرماق.

تۇركيا ءسىم تارابى رەسەيدىڭ ارەكەتىن «ۋكراينا تۇتاستىعىنا اشىق تۇردە قول سالۋ» دەپ باعالاپ، اتالعان ايماقتاردىڭ دەربەستىگىن تانىمايتىنىن جەتكىزدى.

قىتاي بولسا، ادەتتەگىدەي ۋكراينا مەن رەسەيدى ماسەلەنى بەيبىت جولمەن شەشۋگە ءى، قاقتىعىسقا جول بەرمەۋگە شاقىردى.

The Qazaq Times