Qauipsizdik keñesindegi qayşılıq., Foto: BBC

Jahandıq geosayasi jağday tağı bir kürdeli kezeñge ötti. Resey prezidenti Vladimir Putin Ukraina şığısındağı özderin Lugansk jäne Doneck «halıq respublikası» dep atağan aymaqtardıñ derbestigin moyındadı. Äri, atalğan «elderdiñ» qauipsizdigin qamtamasız etu üşin äsker kirgizetinin mälimdedi. Kreml' bwl şeşimi talaydan aytılıp kelgen soğıs qaupin eñ joğarı şekke jetkizdi.

Jağdayğa baylanıstı Ukraina BWW Qauipsizdik keñesin şwğıl otırıs ötkizuge şaqırdı. Al BWW-dağı Resey ökilderi bolsa Doneck pen Lugansktıñ derbestigin tanuğa qarsı şıqqandardı ayıptap jatır.

Mäskeudiñ bwl äreketine Ukraina prezidenti Vladimir Zelenskiy «Minsk kelisiminen bir taraptı şığıp ketu» jäne «Norman törttigi» kelissözderiniñ şeşimderin sıylamau dep bağaladı. Äri ol: «Biz eşnärseden jäne eşkimnen qorıqpaymız. Eşkimge eşnärsege mindetti emespiz jäne eşkimge eşnärse bermeymiz», – dep mälimdeme jasadı.

Reseydiñ Vasili Nebenzya (Reseydiñ BWW-dağı ökili) DNR men LNR-diñ derbestigin tanu Minsk kelisimin bwzğan bolıp sanalmaydı dep te mälimdedi. Onıñ aytuınşa qazirgi bastı mäsele soğıstı qaytıp boldırmau jäne Ukrainanıñ atalğan «respublikalarğa» qarsı arandatu äreketterin toqtatu mañızdı sanaladı eken.

Qazirdiñ özinde BWW Qauipsizdik keñesinde ülken qayşılıq bolıp jatqanı mälim. Onda Ukraina men Reseydiñ BWW-dağı arnay ökilderi qayım aytısqa tüsti.

Putinniñ kezekti äreketine qarsı AQŞ prezidenti Jo Bayden sankciya şeşimderine qol qoyğanı aytıldı. Alayda, onıñ baspasöz ökili Psakidiñ aytuınşa sankciya Lugansk pen Doneck jerlerine investiciya salu jäne qarjı audaruğa qarsı şekteulerge negizdelgen.

Degenmen, BWW-dağı AQŞ ökili «Erteñnen bastap halıqaralıq qwqıqtı aşıq bwzğanı üşin AQŞ Reseyge qarsı sankciya kirgizedi», – dep mälimdedi. Mälimetterge say, bwl sankciya AQŞ-tıñ derbes şekteuleri sanaladı, bwl özge Batıs elderiniñ ortaq qadamdarınan bölek şekteu şaraların jüzege asırmaq.

Türkiya SİM tarabı Reseydiñ äreketin «Ukraina twtastığına aşıq türde qol salu» dep bağalap, atalğan aymaqtardıñ derbestigin tanımaytının jetkizdi.

Qıtay bolsa, ädettegidey Ukraina men Reseydi mäseleni beybit jolmen şeşuge i, qaqtığısqa jol bermeuge şaqırdı.

The Qazaq Times