جۋرناليست ءارى ازاماتتىق بەلسەندىلەر اسەم جاپىشەۆا مەن بەللا ورىنبەت قاڭتار وقيعاسىندا قازا تاپقانداردىڭ اتى-ءجونىن جاريالاۋدى تالاپ ەتىپ، پەتيتسيا ۇيىمداستىردى. سونداي-اق پەتيتسيا ۇيىمداستىرۋشىلارى ۇكىمەتتەن جاپا شەككەندەردىڭ وتباسىنا كومەك بەرۋدى تالاپ ەتتى. بۇل تۋرالى malim.kz مالىمدەدى.

«قاڭتارداعى قايعىلى وقيعا بارىسىندا، رەسمي اقپارات بويىنشا، اسكەري قىزمەتكەرلەرمەن قوسا، بەيبىت حالىق تاراپىنان 225 ادام قازا تاپتى. ءبىز، قازاقستان حالقى، وسى اۋىر كۇندەردە ەل باسىنا تۇسكەن قايعىنى بولىسكىمىز كەلەدى. بىراق 225 تسيفردى ەمەس، 225 قازا تاپقان ادامدى جوقتاپ، قايعى جۇتقان وتباسىنىڭ قاسىرەتىن ءبولىسىپ، كومەكتەسكىمىز كەلەدى.

وسىعان بايلانىستى الاساپىران قاڭتار كۇندەرى قازا تاپقان 225 ادامنىڭ جانە ءىز-ءتۇزسىز جوعالىپ كەتكەن ادامداردىڭ اتى-ءجونىن جاريالاۋىڭىزدى تالاپ ەتەمىز. بۇل تسيفر كوبەيۋى ابدەن مۇمكىن، سەبەبى قازىرگى ۋاقىتتا حابار-وشارسىز كەتكەن، اۋرۋحانادا حال ۇستىندە جاتقان ادامدار ەسەپكە كىرگەن جوق.  سوندىقتان 225 سانى بيلىكتىڭ جاريا ەتكەن قاتىپ قالعان ستاتيستيكاسىنا اينالماۋى كەرەك. ء"بىز بىرگەمىز" ميسسياسى قۇر ۇران تۇرىندە قالماۋعا ءتيىس، سوندىقتان «قازاقستان حالقىنا» قوعامدىق الەۋمەتتىك قورىنىڭ قاراجاتى ەسەبىنەن وسى قازا تاپقان بەيبىت تۇرعىنداردىڭ وتباسىلارىنا ماتەريالدىق كومەك اۋدارۋدى تالاپ ەتەمىز».

پەتيتسياعا قول قويۋعا نيەتتىلەر ءۇشىن ارنايى سىلتەمە دايىندالعان.

ەسكە سالا كەتەيىك، 15 قاڭتاردا باس پروكۋراتۋرا وقيعا كەزىندە 225 ادام قازا تاپقانىن، ونىڭ 19-ى — اسكەريلەر ەكەنىن ايتتى. 4,5 مىڭداي ادام زارداپ شەككەن.