بۇگىن الماتىدا قوعام بەلسەندىلەرى «قاڭتار وقيعاسىن» زەرتتەۋ جونىندەگى تاۋەلسىز كوميسسيا قۇردى. كوميسسيا قۇرامىندا مەملەكەت جانە قوعام قايراتكەرلەرى، ساياساتكەرلەر، قۇقىق قورعاۋشى زاڭگەرلەر مەن جۋرناليستەر بار.

قوعامدىق كوميسسيا ءوزىنىڭ الدىنا مىنانداي مىندەتتەر قويادى جانە ونى جۇزەگە اسىرادى:

  • 2022 جىلعى قاڭتار ايىندا بولعان حالىق تولقۋلارىنا – بەيبىت جيىندارعا، ميتينگىلەر مەن شەرۋلەرگە قاتىسقان جازىقسىز ادامداردى قورعاۋ. ولاردى قاماۋعا، قىسىم كورسەتۋگە، ازاپتاۋعا، جازاعا تارتۋعا جول بەرمەۋ.
  • ازاماتتاردىڭ كونستيتۋتسيالىق قۇقىقتارىن قورعايتىن – بەيبىت، ەركىن تۇردە جينالۋىنا، مەملەكەتتىك ورىندارعا تالاپ قويىپ، نارازىلىق بىلدىرۋىنە، قاۋىپسىزدىگىن ساقتاۋعا قاتىستى زاڭداردى جانە ولاردىڭ قولدانىلۋىن تالقىلاۋ. ۇسىنىستار، وزگەرىستەر ەنگىزۋ.
  • قانتوگىسكە ۇرىندىرعان قاقتىعىستاردىڭ سەبەپتەرىن انىقتاۋ، سالدارلارىنا تالداۋ جاساۋ.
  • ارانداتۋشىلار مەن لاڭكەستەردىڭ بۇزاقىلىق، قىلمىستىق ارەكەتتەرىنىڭ الدىن الماعان، كەي جاعدايدا قانداي دا ءبىر ماقساتپەن ولارعا قولداۋشىلىق، بەيتاراپتىق تانىتقان كۇشتىك قۇرىلىمداردى، ىقپال ەتۋشى تۇلعالاردى اشكەرەلەۋ.
  • قاقتىعىستار كەزىندە، كۇش قولدانۋ، اتۋ سالدارىنان قازا تاپقان ءاربىر ازاماتتىڭ اتى- ءجونىن، ءولىم سەبەپتەرىن انىقتاۋ. اقيقاتتى اشۋ.
  • وقيعاعا قاتىسۋشى سەبەپكەر توپتاردىڭ ارەكەتتەرىنە تالداۋ جاساۋ، قوعامدىق پىكىردى جاريا ەتۋ.
  • پرەزيدەنتتەن باستاپ، مەملەكەتتىك باسقارۋ ورىندارىنىڭ، كۇشتىك قۇرىلىمداردىڭ ارەكەتىنە نەمەسە ارەكەتسىزدىگىنە زاڭدىق، ساياسي باعا بەرۋ.
  • بەيبىت جيىندار، ميتينگىلەر تۋرالى مەملەكەتتىك ساياساتتى، ۇستانىمدى تۇبەگەيلى وزگەرتۋ ماسەلەسىن كوتەرۋ.
  • اسىراۋشىسىنان ايىرىلعان جابىرلەنۋشىلەرگە جەتكىلىكتى كولەمدە ماتەريالدىق وتەماقى تولەتكىزۋ.
  • «ودكب» بىتىمگەرلىك قارۋلى كۇشتەرىن قازاقستانعا كىرگىزۋگە بايلانىستى قوعامنىڭ الاڭداۋشىلىعىن، قارسىلىعىن قولداۋ.
  • سوت پروتسەستەرىنە قاتىسۋ، زاڭدىلىقتىڭ، ازاماتتاردىڭ قۇقىعىنىڭ ساقتالۋىن قاداعالاۋ.
  • ازاماتتاردىڭ قۇقىعىن قورعاۋ جونىندەگى ۇيىمدارمەن، قورلارمەن، زاڭگەرلەرمەن، ادۆوكاتتارمەن بىرلەسىپ جۇمىس ىستەۋ، ولارعا قولداۋ كورسەتۋ.
  • وقيعاعا قاتىستى فوتو، بەينە تۇسىرىلىمدەردى، كۋاگەرلەردىڭ، وقيعاعا قاتىسۋشىلاردىڭ تۇسىنىكتەرىن، ايعاقتاردى، قۇجاتتاردى جيناقتاۋ، تالداۋ جاساۋ جانە ساقتاۋ.
  • ناقتىلى انىقتالعان، دالەلدەنگەن ماتەريالدار نەگىزىندە قورىتىندى جاساۋ جانە بۇۇ-نا، ەۆروپارلامەنتكە، حالىقارالىق سوتقا قازاقستان رەسپۋبليكاسىنداعى حالىقتىڭ بەيبىت شەرۋىنە توسقاۋىل جاسايتىن، ازاماتتىق قۇقىقتارىن شەكتەيتىن كەلەڭسىز جايتتار تۋرالى، نازارباەۆتىق ديكتاتۋرانىڭ جالعاسىپ جاتقاندىعى تۋرالى شاعىمدانۋ.

كوميسسيا قۇرامىندا مەملەكەت جانە قوعام قايراتكەرى، ساياساتكەر بالتاش تۇرسۇمباەۆ، قوعام قايراتكەرلەرى، ساياساتكەر رىسبەك سارسەنباي، قوعام قايراتكەرى، جۋرناليست ەرمۇرات ءباپي، قۇقىق قورعاۋشى مارجان اسپاندياروۆا،  قۇقىق قورعاۋشى عالىم اقەلەۋوۆ، زاڭگەر تيمۋر توقسەيىتوۆ، زاڭگەر ءالنۇر يلياشەۆ، رەجيسسور ەركىن راقشەۆ، قوعام قايراتكەرى نۇرلان بۇلانباي، جۋرناليست-بلوگەر دينارا سەيسەن،  جۋرناليست دۋمان مۇحامەتكارىم، جۋرناليست  ميربولات مىرزاتايۇلى، جۋرناليست قويشىبەك مۇباراك، قوعام بەلسەندىسى ارايلىم نازار كىردى. جانە ءار وبلىستان وكىلدەر تارتىلاتىنى ايتىلدى.

بايلانىس نومەرلەرى  8777- 493-83-83. 8701-299-90-28