جولدىڭ اقىلى بولۋىنا قارسىلىق ءبىلدىرىپ تۇرعان جۇرگىزۋشىلەر. فوتو: KazLogistics قازاقستان تاسىمالداۋشىلارىنىڭ وداعى

بۇگىن، 9 ماۋسىمدا «قازاۆتوجول» ۇك اق قوعامداعى نارازىلىققا قاراماستان الەۋمەتتىك جەلىلەردەگى رەسمي پاراقشاسىندا ەلدەگى ءبىرىنشى ساناتتاعى جول توسەلگەن بەس اۋماقتا بيىل جولدىڭ اقىلى بولاتىنىن مالىمدەدى. 

اتاپ ايتقاندا، ولاردىڭ قاتارىندا «باتىس ەۋروپا – باتىس قىتاي» (قاينار-تاراز، تاراز-شىمكەنت، شىمكەنت-قىزىلوردا، شىمكەنت-تاشكەنت), ششۋچينسك-كوكشەتاۋ، قاپشاعاي-تالدىقورعان، استانا-پاۆلودار جانە اقتاۋ-جەتىباي-جاڭاوزەن ماگيسترالدارى مەن استانا، قاراعاندى، پاۆلودار قالالارىنىڭ اينالما جولدارى بار.

ۇلتتىق كومپانيا اقىلى بولاتىن جولداردىڭ ساپاسىن تەكسەرۋدى تاريف ەنگىزەردەن بۇرىن ەمەس، ەندى قولعا الىپ جاتىر. جول اقىسى سول كۇيىنشە قالادى، ازىرگە باعانىڭ ءوسۋى قاراستىرىلماعان دەلىنگەن كومپانيا حابارلاماسىندا.

اشىق دەرەككوزدەردەگى مالىمەتتەرگە قاراعاندا، اتالعان اقىلى جول باعاسى كولىك قۇرالدارىنىڭ تۇرىنە بايلانىستى وزگەرىپ وتىرادى. جەڭىل كولىكتەر  شاقىرىمىنا 1 تەڭگە، ال اۆتوبۋستار ورىن سانىنا قاراي 1 شاقىرىم ءۇشىن 5-15 تەڭگە ارالىعىندا، جۇك كولىكتەرى جۇك كولەمى مەن سالماعىنا سايكەس ءار شاقىرىمعا 5-25 تەڭگە ارالىعىندا تولەيدى.

بيىل جازعىتۇرىمدا، مامىر ايىنىڭ اياعىنان بەرى قازاقستاندا جولدار اقىلى بولادى دەگەنگە حالىق نارازىلىق ءبىلدىرىپ، بىرنەشە وڭىردە كوپشىلىك قاتىسقان قارسىلىق جيىندارى ءوتىپ كەلەدى. يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ بيىل 5,8 مىڭ شاقىرىم جول اقىلى بولاتىنىن مالىمدەگەن. شالعاي جولعا ءىس-ساپارعا شىعاتىن جۇرگىزۋشىلەر جول ساپاسىنىڭ ناشارلىعىن، اقشا تولەۋگە لايىقسىزدىعىن ايتىپ، مۇنىڭ سوڭى قىمباتشىلىققا الىپ كەلەتىنىن ايتىپ شاعىنادى.

"The Qazaq Times"