ارنايى جاساق شەبى – ەكى الەم ەكۆاتورى: توقاەۆ پەن نازارباەۆ – كونتسەرتتە، ال انالار – كوشەدە

كەشە، قاڭتاردىڭ 21-ءى  تۇس اۋا ەلورداداعى «استانا وپەرا» تەاترىنىڭ الدىنا 50-گە تارتا مۇگەدەك بالا تاربيەلەپ وتىرعان انالار جينالىپ، پرەزيدەنت قاسىم-جومارت توقاەۆتىڭ شىعۋىن تالاپ ەتتى.

مۇمكىندىگى شەكتەۋلى، دەنساۋلىعىندا كىناراتى بار بالالارىمەن قىستىڭ سۋىعى، شىلدەنىڭ اپتابىندا پاتەردەن-پاتەرگە كوشىپ جۇرگەن انالاردىڭ باستى تالابى – باسپانا ماسەلەسىن ەڭ بولماعاندا «زاڭ اياسىندا» شەشىپ بەرۋ. نارازىلار «ۇكىمەت ارى قاراي جەكە مەنشىككە وتكىزىپ، ساتىپ الاتىنداي باسپانامەن قامتاماسىز ەتسىن، تەگىنگە سۇرامايمىز، ايما-اي جاعدايىمىزعا قاراي تولەيمىز» دەيدى.

وقيعا ورنىنان حابار تاراتقان ازاتتىقتىڭ حابارلاۋىنشا، جيىنعا قاتىسۋشىلار قولىنا «مۇگەدەك بالالارعا باسپانا بەرىلسىن!»، «مۇگەدەك بالاعا باسپانا كەرەك» دەگەن جازۋى بار پلاكاتتار ۇستاپ شىققان. جينالعاندار «توقاەۆ!» دەپ ايقايلاپ ۇرانداستى.

نارازى انالار. 21 قاڭتار 2019 جىل. ەلوردا. فوتو: ازاتتىق / اسەمگۇل مۇحيتقىزى

بۇل كەزدە پرەزيدەنت توقاەۆ العاشىندا ءوزىن تاعايىنداپ، كەيىننەن سايلاۋدا قولداعان ەكس-پرەزيدەنت نازارباەۆپەن بىرگە وپەرا تەاترىندا ابايدىڭ 175 جىلدىعىنىڭ اشىلۋىنا ارنالعان كونتسەرتتە وتىردى. ال «جاعدايىمىز مۇشكىل، تۇرمىس تيتىقتاتىپ جىبەردى» دەپ اشىنعان انالار پرەزيدەنتتىڭ عيماراتتان شىعىپ، سۇراقتارىنا جاۋاپ بەرگەنىن قالادى. ولار جەرگىلىكتى بيلىك وكىلدەرىنىڭ «زالدا كەزدەسىپ، دۇرىستاپ سويلەسەيىك» دەگەن ۇسىنىسىنان باس تارتىپ، «ءبارىبىر ەشتەڭە شەشە المايتىنىن، ورىندالمايتىن ۋادەگە تويعانىن» جەتكىزدى.

ابايدىڭ 175 جىلدىق مەرەيتويىنىڭ اشىلۋ كونتسەرتىندە وتىرعان اقوردا مەن كىتاپحانا وكىلدەرى. 21 قاڭتار 2019 جىل. فوتو: اقوردا

كىل ىعاي-سىيعاي مەن ينتەللەگەنتسيا، بيىك مىنبەردەگى شەندىلەر تاماشالاعان كونتسەرت ءوتىپ جاتقان تەاتردىڭ سىرتىندا ارنايى جاساق  تالاپشىل انالار توبىن بوگەپ، ءارى قاراي وتكىزبەدى. اقپارات قۇرالىنىڭ دەرەگىنشە, وندا 50 شاقتى ومون جاساعىنىڭ وكىلدەرى مەن 6 اۆتوبۋس بولعان.

ارنايى جاساق وكىلدەرى. 21 قاڭتار 2019 جىل. ەلوردا. فوتو: ازاتتىق / اسەمگۇل مۇحيتقىزى

اشىنعان انانىڭ ءبىرى جاقسىگۇل اسانوۆا «قىزىم ەكىنشى توپ مۇگەدەگى. باسپانا كەزەگىنە 2014 جىلى تۇرعانمىن. مىنە، ءالى ءجۇرمىز. جۇمىس ىستەمەيمىز. ەكەۋىمىز عانا تۇرامىز. جالعىزباستى انامىن. كۇيەۋىم قايتىس بولىپ كەتكەن. باسپانا ماسەلەسىن ايتىپ، بارماعان جەر، باسپاعان تاۋىمىز قالمادى. بالام 23-تە. جاردەماقى المايمىن. بۇعان دەيىن بارىپ ەدىم، (مۇگەدەكتىككە بايلانىستى تولەنەتىن) ءۇش ايلىق زەينەتاقىنى ەسەپتەدى دە «47 مىڭ تەڭگە سىزگە جەتەدى» دەپ ايتتى. پاتەر جالداپ تۇرامىز. اي سايىن 30 مىڭ تەڭگە تولەيمىز. بۇعان قوسا، جارىقتى تولەۋ كەرەك. جۇمىس ىستەي المايمىن. بالالارىمدى قاراۋ كەرەك. ەركىن قوزعالا المايدى، سويلەي المايدى. 47 مىڭ تەڭگە نەگە جەتەدى؟»، – دەيدى.

تەاتردىڭ بيىك-بيىك سالتاناتتى ەسىگىنە قاراي-قاراي كوز تالدى. سول كۇيى ەشكىم شىقپادى. كەش تۇسە اشىنعان انالاردىڭ ءبىر بولىگى بالا-شاعاسىنا، ۇيىنە قايتسا، ەندىگى ءبىر توبى بويىن جىلىتۋ ءۇشىن كورشى عيماراتقا قاراي كەتكەن.

نارازى انالار ەسىك الدىن توسىپ تۇر. 21 قاڭتار 2019 جىل. ەلوردا. فوتو: ازاتتىق

"The Qazaq Times"