قازان ايىندا باسقا وڭىرلەرگە قاراعاندا ەڭ كوپ سىرقات تىركەلگەن الماتىدا 8 مىڭنان اسا ادامنىڭ تالداۋىنان كوروناۆيرۋس انىقتالعان، تاعى 150 شاقتى ادامعا كوروناۆيرۋس پنەۆمونياسى دياگنوزى قويىلعان. قازىر قالانىڭ 3,8 مىڭ تۇرعىنى ەمدەلىپ جاتىر. جۋىردا عانا سانى قىسقارعان اۋرۋحانالارداعى توسەك-ورىن قورىنىڭ 51%-ىندا ناۋقاستار بار.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 24 قازاندا تىركەلگەن 231 ادامنىڭ 219-ى سيمپتوم بەلگىلەرىمەن، تاعى 12-ءسى سيمپتومسىز. سونىمەن قوسا، جەكسەنبى كۇنى 63 ادام اۋرۋحاناعا جاتقىزىلعان.

جالپى قالادا سىيىمدىلىعى 2334 ورىن بولاتىن ينفەكتسيالىق ستاتسيونارلاردا 1205 ادام ەمدەلىپ جاتىر. ولاردىڭ اراسىندا 33 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 119 ناۋقاس جاتىر. 24 ادام ءوجج، 66 ناۋقاس ءينۆازيۆتى ەمەس ءوجج جانە 19 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 2653 ناۋقاس امبۋلاتورلىق دەڭگەيدە باقىلاۋعا الىنعان.

وتكەن سەنبىدە 5 ادام كوروناۆيرۋس پەن وعان ۇقساس پنەۆمونيادان قايتىس بولعان. قازان ايىندا 145 الماتىلىق وسى دەرتتەن كوز جۇمعان.

رەسمي ەپيدكارتاعا قاراعاندا، الماتى قالاسى ءتورت ايدان بەرى العاش رەت سارى ايماققا ءوتتى. ماۋسىمنىڭ 26-سىندا قىزىل ايماققا ەنگەن قالادا ءتورتىنشى تولقىن وتە اۋىر سيپاتتا ءورشىدى. جۇزدەگەن ادام اۋرۋحاناعا ءتۇسىپ، تاۋلىگىنە بىرنەشە ونداعان ادام كوز جۇمىپ جاتتى.

باقسارمانىڭ مالىمەتىنشە، الماتى قالاسىندا بيىل اقپاننان بەرى 987 مىڭ ادام ەكپەنىڭ العاشقى، ونىڭ ىشىندە 915 مىڭى تولىق دوزاسىن العان. ونىڭ 120 مىڭى 60 جاستان اسقان ازاماتتار. قازىر 137 ەگۋ پۋنكتى مەن 205 ەگۋ بريگاداسىندا 733 مەدقىزمەتكەر جۇمىس ىستەيدى.

الماتى قالاسىندا پاندەميا باستالعالى 183 مىڭنان اسا ادام اۋىرعان، ونىڭ 8,1 مىڭى قازان ايىندا انىقتالىپ ۇلگەردى. قازىر رەسپۋبليكادا تىركەلەتىن كۇندەلىكتى ەسەپتىڭ كەمىندە 15-20%-ى الماتى قالاسىنا تيەسىلى بولىپ وتىر.

The Qazaq Times