قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 1,6 مىڭعا ارتىپ، جالپى ەسەبى 1 ملن 8,5 مىڭنان استى. قازان ايىندا 45 مىڭنان اسا ناۋقاس انىقتالىپ، 852 ادام كوز جۇمعان. بۇل سالىستىرمالى تۇردە بىلتىرعىدان ايتارلىقتاي جوعارى. جاعىمدى جاڭالىق – الماتى قالاسى ءتورت ايدان كەيىن العاش رەت قىزىل ايماقتان شىقتى.
دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 24 قازاندا كوروناۆيرۋس (كۆي+) جۇققان 1573 ادام، ال 23-ءى كۇنى كوروناۆيرۋس پنەۆمونياسىنا (كۆي-) شالدىققان 27 ادام تىركەلدى. سونداي-اق، سەنبىدە 24 قازاقستاندىق اۋرۋدان قايتىس بولدى. بىلتىر ءدال وسى ۋاقىتتا رەسمي ستاتيستيكادا تاۋلىگىنە كوپ دەگەندە 350-گە دەيىن ناۋقاس جانە 5-6 ءولىم جاعدايى تىركەلەتىن، ستاتسيونارلاردا جاتقان سىرقاتتار سانى 3,5 مىڭنان اسپاعان ەدى. قازىر بۇل كورسەتكىش ەسەلەپ ءوسىپ وتىر، بۇگىندە ەلدە 51 مىڭعا جۋىق ادام (كۆي+ بويىنشا 45 مىڭداي، كۆي- بويىنشا 6 مىڭ) اۋىرىپ جاتىر.
#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 14%-ى ادەتتەگىدەي جوعارى ديناميكادا تۇرعان ءبىر عانا الماتى (231) قالاسىنا تيەسىلى. ءبىر كۇندە تىركەلگەن ناۋقاستاردىڭ ۇشتەن ءبىرى استانا جانە الماتى قالاسى مەن وبلىسىنا جاتادى. اۋرۋشاڭدىق پاۆلودار (230), استانا (157), قاراعاندى (142), سقو (140), الماتى وبلىسى (137), اقمولا (134), قوستاناي (112), شقو (102), بقو (35), قىزىلوردا (26), جامبىل (25), اقتوبە (25), اتىراۋ (24), شىمكەنت (21), ماڭعىستاۋ (17), تۇركىستان (15), وبلىستارىندا ءتۇرلى دەڭگەيدە بايقالدى. جەكسەنبىدە اۋرۋدان ايىققان 1176 ادام ۇيىنە شىعارىلعان. 23 قازاندا جيىنى 20 ادام قايتىس بولعان.
#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قازاننىڭ 23-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 27 ناۋقاس ەسەپكە الىندى. ۆەدومستۆو دەرەگىنشە, بۇل كۇنى شقو (10), الماتى وبلىسى (7) جانە استانادان (4) انىقتالعان. سونىمەن قوسا، 75 ادام ايىعىپ شىققان، تاعى 4 ادام كوز جۇمعان.
#جالپى دەنمين دەرەگىنە قاراعاندا، ەمدەلىپ جاتقان 51 مىڭداي ناۋقاستىڭ 9 مىڭى اۋرۋحانادا، 42 مىڭعا جۋىعى امبۋلاتورلىق باقىلاۋدا. 636 ناۋقاستىڭ جاعدايى ناشار، ونداعى 160 ادامنىڭ ءحالى وتە اۋىر. بۇدان وزگە 110 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.
ەپيدكارتادا «جاسىل ايماقتاعى» شىمكەنت، اتىراۋ، تۇركىستان، اقتوبە، ماڭعىستاۋ، بقو، الماتى جانە جامبىل وبلىستارىنان باسقا قاراعاندى، شقو، قىزىلوردا وبلىستارى، الماتى قالاسى «سارى ايماققا» وتكەن. باسقا 5 ايماق (استانا، قوستاناي، پاۆلودار، اقمولا، سقو) تۇتاستاي «قىزىل ايماقتا» تۇر.
دەنميننىڭ QT رەداكتسياسىنا بەرگەن مالىمەتىنشە، ىندەت تاراعان 2020-2021 جىلدارى پتر تەستى وڭ كورسەتكەن 1407 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.
بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ وزىندە 99 مىڭداي ناۋقاس ەسەپكە الىنعان جانە 2117 ادام قايتىس بولعان. ال قازان ايىندا 45 مىڭنان اسا اۋرۋ جانە 852 ءولىم جاعدايى تىركەلگەن.
بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 929 مىڭنان، 1 تامىزدان بەرگى كوروناۆيرۋس پنەۆمونياسى 78 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 1 ملن 8 مىڭنان استى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.
پاندەميانىڭ باس-اياعى 20 ايىندا جالپى ۆيرۋس جۇققانداردان 20,3 مىڭ ادام (كۆي+ / U07.1 – 11 951, كۆي- / U07.2 – 4998, ىلەسپە اۋرۋلاردان – 3415) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.
قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 37-ورىنعا ورنىقتى.
ۇكىمەتتىڭ سوڭعى دەرەگىنە قاراعاندا، قازاقستاندا 7,3 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 8,1 ملن-نان اسادى. دەنساۋلىق ساقتاۋ ءمينيسترى الەكسەي تسوي قاراشا ايىنىڭ ءۇشىنشى ونكۇندىگىنەن باستاپ ۆاكتسينا العانىنا جارتى جىل وتكەندەر ءۇشىن رەۆاكتسياناتسيا ناۋقانى جۇرگىزىلەتىنىن مالىمدەگەن.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟