قازان ايىندا باسقا وڭىرلەرگە قاراعاندا ەڭ كوپ سىرقات تىركەلگەن الماتىدا 7025 ادامنىڭ تالداۋىنان كوروناۆيرۋس انىقتالعان، تاعى 140 ادامعا كوروناۆيرۋس پنەۆمونياسى دياگنوزى قويىلعان. قازىر قالانىڭ 3,8 مىڭ تۇرعىنى ەمدەلىپ جاتىر. اۋرۋحانالارداعى توسەك-ورىن قورىنىڭ 37%-ى تولعان.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 20 قازاندا تىركەلگەن 309 ادامنىڭ 294-ءى سيمپتوم بەلگىلەرىمەن، تاعى 15-ءى سيمپتومسىز. سونىمەن قوسا، سارسەنبى كۇنى 99 ادام اۋرۋحاناعا جاتقىزىلعان.

جالپى قالادا سىيىمدىلىعى 3179 ورىن بولاتىن ينفەكتسيالىق ستاتسيونارلاردا 1201 ادام ەمدەلىپ جاتىر. ولاردىڭ اراسىندا 32 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 133 ناۋقاس جاتىر. 28 ادام ءوجج، 71 ناۋقاس ءينۆازيۆتى ەمەس ءوجج-ىمەن جانە 22 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 2668 ناۋقاس امبۋلاتورلىق دەڭگەيدە باقىلاۋعا الىنعان.

اپتا باسى سەيسەنبىدە 4 ادام كوروناۆيرۋس پەن وعان ۇقساس پنەۆمونيادان قايتىس بولعان. قازان ايىندا 127 الماتىلىق وسى دەرتتەن كوز جۇمعان.

رەسمي دەرەككە قاراعاندا، الماتى قالاسىندا بيىل اقپاننان بەرى 981 مىڭ ادام ەكپەنىڭ العاشقى، ونىڭ ىشىندە 906 مىڭى تولىق دوزاسىن العان. ونىڭ 120 مىڭعا جۋىعى 60 جاستان اسقان ازاماتتار. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

ەپيدكارتادا بىرنەشە ايدان بەرى «قىزىل ايماقتا» تۇرعان الماتى قالاسىندا پاندەميا باستالعالى 183 مىڭعا جۋىق ادام اۋىرعان، ونىڭ 7,1 مىڭى قازان ايىندا انىقتالىپ ۇلگەردى. قازىر رەسپۋبليكادا تىركەلەتىن كۇندەلىكتى ەسەپتىڭ كەمىندە 15-20%-ى الماتى قالاسىنا تيەسىلى بولىپ وتىر. ءۇش جارىم ايدان بەرى «قىزىل ايماقتان» شىعا الماي وتىرعان قالا اۋرۋشاڭدىق بويىنشا ءبىرىنشى قاتاردان تۇسپەي كەلەدى.

The Qazaq Times