قازان ايىندا ەڭ كوپ سىرقات تىركەلگەن الماتىدا 6154 ادامنىڭ تالداۋىنان كوروناۆيرۋس انىقتالعان، تاعى 118 ادامعا كوروناۆيرۋس پنەۆمونياسى دياگنوزى قويىلعان. قازىر قالانىڭ 4,3 مىڭ تۇرعىنى ەمدەلىپ جاتىر. ءتورتىنشى تولقىننىڭ شارىقتاۋ كەزەڭىنە قاراعاندا بۇگىندە كولەمى ەكى ەسەگە قىسقارعان اۋرۋحانالارداعى توسەك-ورىنداردىڭ 43%-ىنا ناۋقاستار جاتقىزىلعان.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 17 قازاندا تىركەلگەن 318 ادامنىڭ 286-سى سيمپتوم بەلگىلەرىمەن، تاعى 32-ءسى سيمپتومسىز. سونىمەن قوسا، جەكسەنبى كۇنى 67 ادام اۋرۋحاناعا جاتقىزىلعان. كۇندەلىكتى تىركەلگەن كەيستەردىڭ سانى ساقتالىپ، ستاتسيونارعا تۇسكەن ناۋقاستار قاتارىنىڭ كۇرت كەمۋى – اۋرۋحاناعا جاتقىزۋ الگوريتمىنىڭ دەمالىس كۇندەرى تولىق جۇمىس ىستەمەيتىنىن كورسەتۋى مۇمكىن. سيمپتومدى ناۋقاستاردىڭ سانى از ەمەس، سوعان قاراماستان اۋرۋحانا ەمىنە قول جەتكىزۋ قيىنداعان نەمەسە باس تارتقان.

جالپى قالادا سىيىمدىلىعى 3179 ورىن بولاتىن ينفەكتسيالىق ستاتسيونارلاردا 1368 ادام ەمدەلىپ جاتىر. ولاردىڭ اراسىندا 28 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 122 ناۋقاس جاتىر. 21 ادام ءوجج، 66 ناۋقاس ءينۆازيۆتى ەمەس ءوجج-ىمەن جانە 26 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 2971 ناۋقاس امبۋلاتورلىق دەڭگەيدە باقىلاۋعا الىنعان.

سەنبىدە 6 ادام كوروناۆيرۋس پەن وعان ۇقساس پنەۆمونيادان قايتىس بولعان. ورتاسىنان اسقان قازان ايىندا 115 الماتىلىق وسى دەرتتەن كوز جۇمعان.

رەسمي دەرەككە قاراعاندا، الماتى قالاسىندا بيىل اقپاننان بەرى 978 مىڭ ادام ەكپەنىڭ العاشقى، ونىڭ ىشىندە 900 مىڭى تولىق دوزاسىن العان. ونىڭ 120 مىڭعا جۋىعى 60 جاستان اسقان ازاماتتار. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

ەپيدكارتادا بىرنەشە ايدان بەرى «قىزىل ايماقتا» تۇرعان الماتى قالاسىندا پاندەميا باستالعالى 182 مىڭ ادام اۋىرعان، ونىڭ 6,2 مىڭى قازان ايىندا انىقتالىپ ۇلگەردى. قازىر رەسپۋبليكادا تىركەلەتىن كۇندەلىكتى ەسەپتىڭ كەمىندە 15-20%-ى الماتى قالاسىنا تيەسىلى بولىپ وتىر. ءۇش جارىم ايدان بەرى «قىزىل ايماقتان» شىعا الماي وتىرعان قالا اۋرۋشاڭدىق بويىنشا ءبىرىنشى قاتاردان تۇسپەي كەلەدى.

The Qazaq Times