قازاقستان پرەزيدەنتى قاسىم-جومارت توقاەۆ. فوتو: kommersant.ru
قازاقستان پرەزيدەنتى قاسىم-جومارت توقاەۆ رەسپۋبليكالىق جانە جەرگىلىكتى جولداردىڭ قۇرىلىسى مەن جوندەۋ جۇمىستارىن رەتكە كەلتىرۋ ءۇشىن وسى سالاداعى تاعى بىرنەشە شەنەۋنىكتى قىزمەتىنەن بوساتۋعا تاپسىرما بەرگەن. بۇل جايلى بۇگىن، 20 ساۋىردە پرەزيدەنتتىڭ ءباسپاسوز حاتشىسى بەرىك ءۋالي Facebook پاراقشاسىندا حابارلادى.
"پرەزيدەنت قاسىم-جومارت توقاەۆتىڭ تاپسىرماسى بويىنشا رەسپۋبليكالىق جانە جەرگىلىكتى جولداردىڭ قۇرىلىسى مەن جوندەۋ جۇمىستارىن رەتكە كەلتىرۋ جالعاسىپ جاتىر. وسى سالاداعى جۇمىستاردى جانە باقىلاۋدى بوساڭسىتىپ العانى ءۇشىن يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ توراعاسى س.بارماقوۆ، باتىس قازاقستان، سولتۇستىك قازاقستان جانە اقتوبە وبلىستارى اكىمدەرىنىڭ ورىنباسارلارى ت.شاكىموۆ، ي.تۋركوۆ جانە ن.قالاۋوۆتار قىزمەتىنەن بوساتىلدى. ۇكىمەت، اكىمدەر، قۇقىق قورعاۋ ورگاندارى بيۋدجەت قارجىسىنىڭ ءتيىمسىز جۇمسالۋىنىڭ الدىن الۋ، جول قۇرىلىسى سالاسىنداعى كەلەڭسىزدىكتەردى جويۋ ءۇشىن شارالار قابىلداپ جاتىر" دەلىنگەن ءۋاليدىڭ Facebook-تاعى جازباسىندا.
وتكەن اپتادا توقاەۆ "قازاۆتوجول" ۇلتتىق كومپانياسىنىڭ باسشىسى ۇلان ءالىپوۆتىڭ قىزمەتىنەن بوساتقان. سول كەزدە ونىڭ ءباسپاسوز حاتشىسى بەرىك ءۋالي Facebook-تاعى پاراقشاسىندا پرەزيدەنتتىڭ ءالىپوۆتىڭ جۇمىسىنا كوڭىلى تولماعانىن جازعان ەدى.