جاپوننىڭ جاڭا باس ءۋازىرى: قىتايعا قارسى جاڭا مينيسترلىك قۇرىلماق

بۇگىن، 4 قازان، دۇيسەنبىدە جاپونيانىڭ جاڭا باس ءۋازىرى (پرەمەر-ءمينيسترى) قىزمەتىنە كىرىستى. جاپون ۇكىمەتىنىڭ جاڭا جەتەكشىسى قىتايعا قارسى ەكونوميكالىق جانە قورعانىس قاۋىپسىزدىگىن نىعايتادى دەپ كۇتىلۋدە.

64 جاستاعى باس ءۋازىر فۋميو كيشيدا بۇعان دەيىن جاپونيانىڭ سىرتقى ىستەر ءمينيسترى قىزمەتىن دە اتقارعان. ول وتكەن اپتاداعى سايلاۋدا بىرقاتار كانديداتتاردان ايقىن باسىمدىق كورسەتتىپ بيلەۋشى ليبەرال-دەموكراتيالىق پارتيانىڭ جەتەكشىسى بولدى.

بۇگىن جاپون ۇكىمەتىن ءبىر جىل باسقارعان يوشيحيدە سۋگا مىرزانىڭ كابينەتى تولىقتاي وتستاۆكاعا كەتتى. ول وزىنەن بۇرىن باس ءۋازىر بولعان شيندزو ابە دەنساۋلىعىنا بايلانىستى قىزمەتتەن كەتكەندە ونىڭ ورنىنا ۇكىمەت باسشىسى بولعان ەدى. سۋگا باسقارعان باس ءۋازىر كابينەتى پاندەمياعا قارسى ءالسىز ەركەتتەرىمەن عانا سىنعا الىندى.

فۋميو كيشيدا قۇرعان مينيسترلەر كابينەتى سىرتقى ىستەر جانە قورعانىس مينيسترلىگىن ساقتاپ قالادى، قازىرگى سىرتقى ىستەر ءمينيسترى توشيميتسۋ موتەگي مەن قورعانىس ءمينيسترى نوبۋو كيشيگە لاۋازىمىن جالعاستىرۋعا مۇمكىندىك بەرمەك. كيشيدا بۇل قادامدى جاپونيا مەن اقش اراسىنداعى قورعانىس قاۋىپسىزدىگى ىنتىماقتاستىعىن تۇراقتى دامىتۋ ءۇشىن جاساعانى انىق.

بۇعان قوسا پرەمەر-مينيستر كيشيدا ەكونوميكالىق قاۋىپسىزدىك جونىندەگى جاڭا مينيسترلىك قۇرماق. بۇل مينيسترلىك قىتايدىڭ كەيبىر ماڭىزدى تەحنولوگيالاردى ۇرلاۋىنا قارسى ارەكەت ەتەدى، سونداي-اق قىتايدان ەكونوميكا مەن قورعانىسقا تونەتىن قاۋىپكە قارسى تۇرادى.

سايلاۋالدى باعدارلاماسىندا فۋميو كيشيدا ۇلتتىق قورعانىس جانە تەڭىز كۇشتەرىنىڭ قۋاتىن ارتتىرۋعا دەن قوياتىنىن، «قورعانىس شىعىندارى ءۇشىن ءجىو-ءنىڭ 1 پايىزى» دەگەن قاعيداعا قاتىپ قالمايتىنىن، قاجەت جاعدايدا قورعانىسقا مولىنان قاراجات بولەتىنىن جاريالاعان. بۇل كيشيدا باسقارعان جاپون بيلىگىنىڭ قىتايدىڭ اسكەري-ساياسي كەڭەيۋىنە قارسى بەلسەندى ارەكەت ەتەتىنىن اڭعارتادى.

The Qazaq Times