الماتىدا كوروناۆيرۋس پاندەمياسىنىڭ ءتورتىنشى تولقىنى ءالى باسەڭدەمەي تۇر. تاپ قازىر قالانىڭ 11,5 مىڭعا تارتا تۇرعىنى ەمدەلىپ جاتىر. قازىر ستاتسيونارلاردا شامامەن 48,7% ورىن تولعان. 

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 7 قىركۇيەكتە تىركەلگەن 911 ادامنىڭ 872-ءسى سيمپتوم بەلگىلەرىمەن، تاعى 39 ادام سيمپتومسىز تىركەلگەن. سەيسەنبى كۇنى 379 ادام اۋرۋحاناعا جاتقىزىلعان.

جالپى قالادا سىيىمدىلىعى 7705 ورىن بولاتىن ينفەكتسيالىق ستاتسيونارلاردا 3754 ادام ەمدەلىپ جاتىر. ولاردىڭ اراسىندا 116 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 339 ناۋقاس جاتىر. 58 ادام ءوجج، 137 ناۋقاس ءينۆازيۆتى ەمەس ءوجج-ىمەن جانە 168 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 7735 ناۋقاس امبۋلاتورلىق دەڭگەيدە باقىلاۋعا الىنعان.

دۇيسەنبىدە جيىنى 23 ادام كوروناۆيرۋس پەن وعان ۇقساس پنەۆمونيادان قايتىس بولعان.

رەسمي دەرەككە قاراعاندا، الماتى قالاسىندا بيىل اقپاننان بەرى 895 مىڭ ادام ەكپەنىڭ العاشقى، ونىڭ ىشىندە 773 مىڭى تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

جالپى پاندەميا باستالعالى قالادا 161 مىڭنان اسا ادام اۋىرعان، ونىڭ 40 مىڭعا جۋىعى تامىزدا انىقتالعان. قازىر رەسپۋبليكادا انىقتالعان كۇندەلىكتى ەسەپتىڭ كەمىندە شيرەك بولىگى الماتى قالاسىنا تيەسىلى بولىپ وتىر.

ەپيداحۋالدىڭ ناشارلاۋىنا بايلانىستى تامىزدا قالىپتى جاعدايدا قولدانىلىپ جۇرگەن 7011 توسەك-ورىن 8910-عا دەيىن كوبەيتىلگەن. كەشە بۇل 7705 ورىنعا دەيىن قىسقارتىلدى.

The Qazaq Times