جەدەل جاردەم كولىگى. كورنەكى سۋرەت. فوتو: newtimes.kz / ىدىرىش ەرتاي

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 3,9 مىڭعا ارتىپ، جالپى ەسەبى 888 مىڭنان استى.

ءتورتىنشى تولقىن ەكپىندەي باستاعان شىلدە ايىنىڭ ورتاسىنا قاراي تاۋلىكتىك سىرقاتتار سانى 5 مىڭنىڭ، تامىزعا قاراي 7 مىڭنىڭ ۇستىنە شىققان ىندەت قارقىنى ءبىر اپتادان بەرى 4-5 مىڭ كەيسكە ماڭايلادى. 5 قىركۇيەكتە ەكى ايدان بەرى (12 شىلدەدەن) العاش مارتە 4 مىڭنان كەم جاعداي تىركەلدى. دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 5 قىركۇيەكتە كوروناۆيرۋس (كۆي+) جۇققان 3897 ادام، ال 4-ءى كۇنى  كوروناۆيرۋس پنەۆمونياسىنا (كۆي-) شالدىققان 67 ادام تىركەلدى جانە سەنبىدە 91 قازاقستاندىق اۋرۋدان قايتىس بولدى. قازىر ەلدە 93 مىڭ ادام (كۆي+ بويىنشا 85 مىڭ، كۆي- بويىنشا 7,5 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 28%-ى ادەتتەگىدەي جوعارى ديناميكادا تۇرعان ءبىر عانا الماتى (1085) قالاسىنا تيەسىلى. بۇدان وزگە قاراعاندى (492), استانا (330), الماتى (279) جانە پاۆلودار (255), اقمولا (234), قوستاناي (215), ماڭعىستاۋ (209) وبلىستارىندا ەپيداحۋال ءالى دە ناشار كۇيدە. شقو (148), اتىراۋ (120), جامبىل (95), بقو (83), قىزىلوردا (79), شىمكەنت (79), سقو (74), اقتوبە (67), تۇركىستان (53) وڭىرلەرىندە دەرت قارقىنى ءبىرشاما باسەڭدەگەنى بايقالادى. كەشە، جەكسەنبىدە اۋرۋدان ايىققان 4982 ادام ۇيىنە شىعارىلعان. 4 قىركۇيەكتە جيىنى 72 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قىركۇيەكتىڭ 4-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 67 ناۋقاس ەسەپكە الىندى. ۆەدومستۆو دەرەگىنشە، بۇل كۇنى سىرقاتتار شىمكەنت (11), شقو (9), الماتى (8), جامبىل (7), اتىراۋ (6) وبلىستارىندا، الماتى قالاسى مەن استانادا (ارقايسىندا بەسەۋدەن) كوپتەپ انىقتالعان. سونىمەن قوسا، 35 ادام ايىعىپ شىققان، تاعى 19 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 93 مىڭ ناۋقاستىڭ 21 مىڭى اۋرۋحانادا، 72 مىڭدايى امبۋلاتورلىق باقىلاۋدا. 1491 ناۋقاستىڭ جاعدايى ناشار، ونداعى 425 ادامنىڭ ءحالى وتە اۋىر. بۇدان وزگە 201 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» تۇركىستان وبلىسىنان باسقا شقو، سقو، جامبىل، قىزىلوردا وڭىرلەرى «سارى ايماققا» وتكەن. باسقا 12 ايماق تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 816 مىڭنان، 1 تامىزدان بىلايعى كوروناۆيرۋس پنەۆمونياسى 71 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 888 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 17 مىڭنان اسا ادام (كۆي+ / U07.1 – 9851, كۆي- / U07.2 – 4572, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 36-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 5,6 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 6,8 ملن-نان اسادى.

The Qazaq Times