جارىلىستان كەيىنگى ءتورتىنشى كۇنگە دەيىن ءىز-دەرەگى بەلگىسىز قىزمەتكەرلەردىڭ تۋىستارى كوز جەتكىزىپ-تانۋ ماقساتىندا ءمايىت تيەلگەن كولىكتى توقتاتىپ قاراپ جاتىر. 30 تامىز 2021 جىل. جامبىل وبلىسى. فوتو: QT / كۇلتەگىن اسپانۇلى

جامبىل وبلىسى بايزاق اۋدانىنداعى وق-ءدارى قويماسى جارىلعان №28349 اسكەري ءبولىمى اۋماعىنان 15-ءشى ءمايىت تابىلدى.

وقيعا ورنىنان اقپارات تاراتىپ جۇرگەن QT ءتىلشىسى بۇگىن، 30 تامىز كەشكىسىن ساعات 18.20-دا اسكەري ءبولىمنىڭ شىعا بەرىسىندە ورنالاسقان بەكەتتەن مارقۇمنىڭ سۇيەگىن ارقالاعان كولىكتى كورگەن. تۋىسىنان حابار توسقان ەكى توپ كولىكتى توقتاتىپ قاراپ كوردى.

كىشى سەرجانتتار ادىلەت ادىلبەكوۆ پەن باۋىرجان داۋىتباەۆتىڭ تۋىستارى ءتورت كۇننەن بەرى ولاردان بەيحابار وتىر. جارىلىس بولعان كەزدە ەكەۋى دە قويما ماڭىندا قىزمەت بارىسىندا بولعان.

بۇل دەرەكتى سالدەن كەيىن تجم راستادى. ءمايىتتى قورعانىس مينيسترلىگىنىڭ ساپەرلەرى تاپقان، قازىر مارقۇمنىڭ كىم ەكەنى انىقتالىپ جاتىر.

اپاتتان كوز جۇمعانداردىڭ اراسىندا ءورت سوندىرۋشىلەر، توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار.

26 تامىز بايزاق اۋدانىنداعى اسكەري ءبولىمنىڭ قويماسىنان ءورت شىعىپ، ارتى بىرنەشە دۇركىن جويقىن جارىلىسقا ۇلاسقان. سوڭعى رەسمي دەرەككە ساي، توتەنشە وقيعا سالدارىنان 15 ادام قازا تاۋىپ، 100 شاقتى ادام زارداپ شەككەن.

اسكەري ءبولىمنىڭ تۇبىندەگى قاينار شاعىن اۋىلىندا 17 ۇيدە 90-عا تارتا تۇرعىن مەكەندەيدى. اۋدان كولەمىندە 118 ءۇي-نىسان بۇلىنگەن. ايماقتاعى اتقارۋشى بيلىك وكىلدەرى ەكى اي مەرزىمدە بارلىق ماتەريالدىق جانە ينفروقۇرىلىم شىعىندارىن قالىپقا كەلتىرۋگە ۋادە بەردى.

وقيعا بولعان كەزدە حابار-وشارسىز كەتكەن ەكى ادامدى ءالى ىزدەپ جاتىر.  ولاردى تابۋ ءۇشىن كينولوگ، ءيىسشىل يتتەر، ساپەرلەر، اسكەريلەر، تج ماماندارى، جالپى جيىنى 40-تان اسا تەحنيكا، 180-دەي ادام جۇمىلدىرىلعان.

The Qazaq Times