جامبىلداعى جارىلىس: ءۇش ءمايتتىڭ كىم ەكەنى ءالى بەلگىسىز، ءۇش ادام ىزدەستىرىلىپ جاتىر

بۇگىن، 28 تامىزدا توتەنشە جاعدايلار مينيسترلىگى جامبىل وبلىسى بايزاق اۋدانىندا جارىلىس بولعان اسكەري بولىمنەن تاعى ءبىر ادامنىڭ دەنەسى تابىلعانىن حابارلادى. وسىلايشا جويقىن جارىلىس سالدارىنان قازا بولعاندار سانى 13 ادامعا جەتتى. 

مينيسترلىكتىڭ 28 تامىزداعى اقپاراتىنا قاراعاندا، ءمايىتى كەشە تابىلعان 5 ادامنىڭ كىم ەكەنى انىقتالعان. ال ءۇش ءمايىتتىڭ كىم ەكەنى ءالى بەلگىسىز. بۇعان قوسا، ءۇش ادام ءالى ىزدەستىرىلىپ جاتىر.

جويقىن جارىلىستان قازا بولعان 13 ادامنىڭ 10-ى بەلگىلى. ولار:

1. مەشىنباي مارات سايلاۋۇلى، سەرجانت;
2. جانبولاتوۆ رۋسلان ءجۇرسىنبايۇلى، ەفرەيتور;
3. داليباەۆ ورازبەك دايرابەكۇلى، اسكەري كۇزەت قىزمەتكەرى;
4. ارمان قاپەزوۆ، وڭتۇستىك ءوڭىردىڭ اسكەري پروكۋرورى;
5. ەركىن ەرىكبايۇلى نادىربەكوۆ، ءورت ءسوندىرۋ كومانداسىنىڭ باستىعى، كەلىسىم-شارت قىزمەتىنىڭ ستارشيناسى;
6. تەمىربولاتوۆ ارنۇر سەرىكۇلى، ءورت ءسوندىرۋشى-قۇتقارۋشى;
7. ساندىباەۆ ەلدوس قادىربايۇلى، اعا ءورت ءسوندىرۋشى-قۇتقارۋشى;
8. ميكروپۋلو الەكساندر نيكولاەۆيچ،  ءورت ءسوندىرۋ كەزەكشى قىزمەتىنىڭ جەدەل كەزەكشىسى;               
9. تورەبەكوۆ تاڭىبەرگەن كۇدايبەرگەنۇلى، ءورت ءسوندىرۋشى-قۇتقارۋشى;
10. م.ك.ايمانوۆ، جامبىل وبلىسى تجد "وسجاقجق" مم باستىعىنىڭ ورىنباسارى;

26 تامىز كۇنى كەشكە جامبىل وبلىسى بايزاق اۋدانىندا قورعانىس مينيسترلىگىنە قاراستى اسكەري بولىمشەنىڭ قويماسىنان ءورت شىعىپ، وق-ءدارى جارىلعان. قورعانىس مينيسترلىگىنىڭ اقپاراتىنا قاراعاندا، كەمى ون جارىلىس بولعان.

The Qazaq Times