بەكشين: جالعان پاسپورت جاساتقاندار ەكپەنى اقىلى تۇردە سالدىرۋ كەرەك

الماتى قالاسىنىڭ باس سانيتارى جانداربەك بەكشين جالعان ۆاكتسينا پاسپورتىن جاساتقاندارعا ەكپە الۋدى اقىلى ەتۋ كەرەك دەگەن پىكىردە.

سەيسەنبى كۇنگى قالالىق وكق الاڭىندا وتكەن بريفينگتە جانداربەك بەكشين:

«بۇل جونىندە كوپشىلىك تە ايتىپ جاتىر. مەملەكەتكە شىعىن كەلتىرگەندەرگە وسىنداي شارا قولدانعان ءجون دەپ ەسەپتەيمىن. بىرىنشىدەن، ولار ەكپە سالعىزباعان، ەكىنشىدەن، ۆاكتسينانى تەككە توگىپ، ىسىراپ ەتتى. سوندىقتان ولار ەندى ءوز قالتاسىنان تولەسىن»، – دەيدى.

قازاقستاندا كوروناۆيرۋسقا قارسى ۆاكتسينا مەملەكەت قارجىسىنا ساتىپ الىنعان جانە حالىققا تەگىن سالىنىپ جاتىر. ازىرگە اقىلى ۆاكتسينانىڭ ءتارتىپ ەرەجەسى بەكىتىلمەگەن.

«بۇل مەنىڭ پىكىرىم. ەكپە سالدىرۋعا كەلگەن ادامنان ەشكىم (مەدقىزمەتكەر) باس تارتا المايدى. ءيا، ول (جالعان پاسپورت جاساتقان ادام – رەد.) قاتەلىك جىبەردى. بىزدە كوۆيدكە قارسى ۆاكتسينا بيۋدجەت ەسەبىنەن جۇرگىزىلەتىنى بەلگىلى. سول سەبەپتى وعان كەز كەلگەن ەگۋ پۋنكتىندە تەگىن سالىنادى. تەك جاعدايدىڭ ءمان-جايىن ءتۇسىندىرىپ ايتۋى كەرەك. بۇل جەكەلەي شەشىلەدى. ەكپە الۋعا نيەتتى ارقانداي ازامات زاڭ بۇزدى-بۇزبادى دەمەي بىردەي ۆاكتسينا الا الادى. بۇل مۇمكىندىكتەن ايىراتىن ارنايى تەتىك جوق»،  – دەپ پىكىرىن تولىقتىردى ول.

باس سانيتار بەكشين بۇگىنگە دەيىن ەكپە سالعىزعانى جايلى جالعان پاسپورت جاساتقانداردىڭ ناقتى سانىن ايتا المادى.

رەسمي مالىمەت بويىنشا، الماتى قالاسىندا بيىل اقپاننان بەرى 816 مىڭ ادام ەكپەنىڭ العاشقى، ونىڭ ىشىندە 647 مىڭى تولىق دوزاسىن العان. جالپى پاندەميا باستالعالى قالادا 130 مىڭنان اسا ادام اۋىرعان، ونىڭ 23 مىڭنان استامى كەيىنگى ەكى اپتادا انىقتالعان.

The Qazaq Times