بەكشين ءتورتىنشى تولقىننىڭ شارىقتاۋ شەگى قاشان وتەرىن بولجادى

الماتى قالاسىنىڭ باس سانيتار دارىگەرى جانداربەك بەكشين بەيسەنبىدە وكق-دا وتكەن بريفينگتە «قالادا ەپيداحۋال ناشارلاپ جاتىر، ىندەتتىڭ كەزەكتى تولقىنى تامىز ايىندا شارىقتاۋ شەگىنە جەتەدى» دەپ مالىمدەدى. ونىڭ ايتۋىنشا، وتكەن اپتادا الدىڭعى اپتامەن سالىستىرعاندا قالادا اۋرۋشاڭدىق 1,4 ەسەگە وسكەن.

– 23 شىلدەدەن باستاپ قالادا كۇنىنە انىقتالاتىن ناۋقاستار مىڭنان اسا باستادى. وتكەن تاۋلىكتە 1450 ناۋقاس تىركەلدى. شىلدەدە بارلىعى 20 812 ناۋقاس انىقتالدى. بولجام بويىنشا، كوروناۆيرۋس ىندەتىنىڭ كەزەكتى تولقىنى شارىقتاۋ شەگىنە تامىزدا جەتەدى. ەڭ جوعارى كورسەتكىش 10-12 تامىزدا تىركەلەدى. وسىعان وراي پروفيلاكتيكالىق جۇمىستار جۇرگىزىپ جاتىرمىز، – دەدى بەكشين.

ول ىندەتتىڭ ءورشۋىن كوروناۆيرۋستىڭ «دەلتا» شتامىنىڭ جىلدام تاراۋىمەن بايلانىستىردى. باس سانيتار دارىگەردىڭ بولجامىنشا، ىندەت قىركۇيەك ايىندا باسەڭدەۋى مۇمكىن.

«ءتورتىنشى تولقىن تامىز ايىنىڭ ورتاسىندا قىركۇيەك ايىنىڭ باسىندا تومەندەۋى مۇمكىن. تامىز ايىندا 34,5 مىڭ، قىركۇيەكتە 4,5 مىڭ ادام سىرقاتتانۋى ىقتيمال.7 كۇن ىشىندە «سيمپتومدى» ناۋقاستاردىڭ ۇلەس سالماعى 89,4-تەن 90,7%-عا دەيىن ارتتى»، – دەدى ول اۋرۋشاڭدىق ۇدەگەنىن ەسكەرتىپ.

باس سانيتار قازىر كوروناۆيرۋستىڭ «ءتورتىنشى تولقىنى» ءجۇرىپ جاتقانىن ايتادى. العاشقى تولقىن بىلتىر «ماۋسىم-شىلدە قىرعىنىندا» شارىقتاۋ شەگىنە جەتكەن ەدى. كەيىننەن قازان مەن بيىل قاڭتار ايلارىنىڭ ارالىعىندا ىندەتتىڭ ەكىنشى تولقىنى بولىپ، بۇل كەزدە ەڭ جوعارى كورسەتكىش قاڭتاردا تىركەلگەن. ال كوروناۆيرۋستىڭ ءۇشىنشى تولقىنى بريتاندىق شتامىنىڭ تارالۋىمەن باستالعان. بۇل كەزدە ءساۋىر ايىندا اپتاسىنا شامامەن 20 مىڭ ناۋقاسقا دەيىن انىقتالدى. ماۋسىمدا «دەلتاعا» بايلانىستى ىندەت قايتا قايتا كۇشەيىپ، ءتورتىنشى تولقىنعا ۇلاستى.

وتكەن 7 كۇندە ۆيرۋس جۇقتىرۋ ىقتيمالدىعى ساۋدا نىساندارىندا – 35%، وتباسىلىق بايلانىستا – 19%، قوعامدىق كولىكتە – 16%، بازارلاردا – 14%، ساياباق پەن كوشەلەردە – 3,6%-دى كورسەتكەن.

قوعامدىق دەنساۋلىق باسقارماسىنىڭ مالىمەتىنشە، قازىرگى كەزدە ينفەكتسيالىق ستاتسيونارلاردا 4148 ادام ەمدەلۋدە، ونىڭ 215-ءى بالا. رەانيماتسيا بولىمشەلەرىندە 281 سىرقات توسەك تارتىپ جاتىر. ونداعى 27 ناۋقاس ءوجج اپپاراتىمەن، 121-ءى ءينۆازيۆتى ەمەس، 98-ءى High flow قۇرىلعىسىمەن تىنىستاۋدا.

جانداربەك بەكشيننىڭ حابارلاۋىنشا، ەرتەڭ جۇما كۇنى تامىز اينىڭ العاشقى جارتىسىنا ارنالعان قاۋلى جاريالانىپ، قالادا كارانتين كۇشەيمەك. 29 شىلدەدەگى جاعداي بويىنشا، الماتى تۇرعىندارىنىڭ 35,2%-ى ەكپەنىڭ ءبىرىنشى كومپونەنتىن، 24,2% ەكىنشى كومپونەنتىن العان. ەپيدەميولگتىڭ ايتۋىنشا، جالپى الماتىلىقتاردىڭ ۇجىمدىق يممۋنيتەتى 34%-عا جەتكەن.

“The Qazaq Times”