«تاليبان» قارۋلى توپتارى ەلدىڭ شەكارا ايماقتارىن وزىنە قاراتىپ، ەندى بىرتىندەپ ورتالىق قالا كابۋلعا جاقىنداي ءتۇستى. اقش ۇكىمەتىندەگى كەيبىر اقپارات كوزدەرى كابۋل بيلىگىنىڭ قۇلاۋىنا ءبىر ايدان ءۇش ايعا دەيىن ۋاقىت قالعانىن ايتۋدا.

قازىر اۋعانستاننىڭ ەكىنشى ۇلكەن قالاسى كانداھار ءۇشىن كۇرەس سۇراپىل جۇرۋدە. كەشە تالىپتەر ەلدىڭ تاجىكستانعا جاقىن باداحشان پروۆينتسياسىنىڭ ورتالىعى فايزاۆاد قالاسىن باقىلاۋىنا العانىن مالىمدەگەن. وعان قوسا كابۋلعا جاقىن گازني قالاسىن الۋعا ارەكەت ەتىپ جاتقانىن BBC ءوزى اقپارات كوزدەرىنە سىلتەمە جاساپ حابارلاپ ەدى.

«تاليبان» ۇيىمىنىڭ قازىرگە دەيىن قول جەتكىزگەن ەڭ ۇلكەن جەتىستىگى قۇندىز قالاسىن وزىنە قاراتۋى دەۋگە بولادى. اۋعانستاننىڭ ورتالىق ازياعا شىعاتىن ءىرى قاقپاسىنا جاقىن قۇندىز قالاسى ستراتەگيالىق ماڭىزعا يە.

تالىپتەردىڭ الداعى نىساناسى مازاري-شاريف ەكەنىن رەسمي مالىمدەمەسىندە ايتتى. بۇل شاھار بالح ايماعىنىڭ اكىمشىلىك ورتالىعى سانالادى. بالىق ايماعى بولسا وزبەكستان، تۇركىمەنستان جانە تاجىكستانعا جالعاسىپ جاتادى. تالىپتەردىڭ مازاري-شاريفكە كوز تىگىپ وتىرعانىن ەستىگەن جەردەن اۋعانستان پرەزيدەنتى اشراف عاني سول قالاعا ۇشىپ باردى. ول ونداعى اسكەري جەتەكشىلەرگە جانە تاجىك دياسپوراسىنىڭ ليدەرلەرىمەن كەزدەسۋدى جوسپارلاعانى ءمالىم.

The Qazaq Times