تالىپتەر اۋعانستانداعى ماڭىزدى پروۆينتسيا ورتالىقتارىن باسىپ الدى

وتكەن اپتادا «تاليبان» اۋعانستانداعى ستراتەگيالىق ماڭىزعا يە پروۆينتسيا ورتالىقتارىنا شابۋىل باستاعان بولاتىن. اپتا سوڭىندا ۇكىمەت كۇشتەرى مەن تالىپتەر اراسىنداعى وسى پروۆينتسيا ورتالىقتارىنا تالاس قاقتىعىستارى سۇراپىل ءجۇردى. ناتيجەسىندە تالىپتەردىڭ 5 پروۆينتسيا ورتالىق باسىپ العانى حابارلانۋدا.

ايتا كەتۋ كەرەك، اۋعانستاندا وتكەن اپتا سوڭىندا بولعان قاقتىعىستىڭ ناتيجەسى تۋرالى اقپاراتتار الۋان ءتۇرلى. باتىس اقپارات قۇرالدارى قۇندىز، سار-ە-پۋل، تالوكان سەكىلدى 5 پروۆينتسيا ورتالىقتارى تالىپتەردىڭ قولىنا ءوتتى دەپ مالىمدەسە، جەرگىلىكتى رەسميلەر تاراتقان مالىمەتتەردە بۇل پروۆينتسيا ورتالىقتارىنىڭ كەيبىرى ءالى دە تالاس ۇستىندە ەكەنى، ۇكىمەت كۇشتەرى ءوز باقىلاۋىن جوعالتپاعانىن ايتادى.

قۇندىز قالالىق كەڭەسىنىڭ توراعاسى مۋحاممەد يۋسۋف جەكسەنبى كۇنگى مالىمدەمەسىندە، تالىپتەردىڭ قۇندىز قالاسىنا شاۋىل جاساعانىن راستادى. الايدا، ونىڭ ايتۋىنشا «تاليبان» كۇشتەرى قالانىڭ تەك كەيبىر اۋماقتارىنا عانا يەلىك ەتىپ تۇر.

اقش باستاعان شەتەل كۇشتەرى ەلدەن شىعارىلا باستاعان كەزدە اۋعانستاندا ىشكى قاقتىعىس كۇشەيىپ كەتتى. تالىپتەر جاعى «ءال-جازيرا» ارناسى ارقىلى قۇراما شتاتتارعا ەسكەرتۋ جاساپ، بۇدان بىلاي اۋعان جەرىنە قول سالماۋى كەرەك دەدى.

“The Qazaq Times”