بوكستان قازاقستان ەرلەر قۇراماسىنىڭ باس باپكەرى عالىمبەك كەنجەباەۆتىڭ قىزمەتىنەن كەتۋ-كەتپەۋى ءالى بەلگىسىز. بۇل تۋرالى 5 تامىز كەشكە ورتالىق كوممۋنيكاتسيالار قىزمەتىندە وتكەن بريفينگ باراسىندا ايتىلدى.

ءتىلشى: قازاقستان بوكسشىلارى ءوز تاريحىندا العاش رەت وليمپيادادان التىن مەدال الا المادى. وسىنى ەسكەرىپ، باس باپكەرلىكتەن ءوز ەركىڭىزبەن كەتۋ ويىڭىزدا بار ما؟

عالىمبەك كەنجەباەۆ: ەندى... ونداي وي ارينە... جاڭا سەرىك ساپيەۆ ايتتى، مەن... ونداي وي ارينە بار. ەندى ونىڭ بارلىعىن.. قازىر باسشىلار جينالادى. سولاردىڭ ءبارىن تىڭداپ... ەندى... سولار شەشىمگە كەلەدى

ءتىلشى: باسشىلىق ءسىزدى باس جاتتىقتىرۋشى رەتىندە قالدىرۋ جايلى شەشىم شىعارسا، سوعان كەلىسەسىز بە؟

عالىمبەك كەنجەباەۆ: ەندى ونى باسشىلار شەشەدى. بىراق مەن ونداي سۇراققا سىزگە...

(وتستاۆكا جايلى قويىلعان سۇراقتىڭ ۋاقىتى 33:45)

كەنجەباەۆ وتستاۆكاسى جايلى سۇراق قويىلعاندا كىبىرتىكتەپ، ناقتى جاۋاپ بەرگەن جوق. سول ساتتە بريفينگ مودەراتورى دا ءجۋرناليستىڭ ءوزى قويعان سۇراعىنا دۇرىستاپ جاۋاپ الۋىنا مۇرسات بەرمەي، ءسوزىن ءبولىپ تاستادى.

جازعى وليمپيادا ويىندارىنا 1996 جىلدان بەرى جەكە ەل رەتىندە قاتىسىپ كەلە جاتقان قازاقستان بوكستان كەم دەگەندە ءبىر التىن الاتىن. بىراق توكيودا قازاقستان بوكسشىلارى ەكى قولا جۇلدە عانا ەنشىلەدى. بۇل كەنجەباەۆ جاتتىقتىرعان قۇرامانىڭ العاشقى انتيرەكوردى ەمەس.  بيىل مامىردا دۋبايدا وتكەن ازيا چەمپيوناتىندا قازاقستان بوكسشىلارى 2002  جىلدان بەرى ەسەپتەگەندە العاش رەت التىن مەدال الا الماي قالعان بولاتىن.

عالىمبەك كەنجەباەۆ – 2018 جىلدىڭ جەلتوقسانىنان بەرى بوكستان ەرلەر قۇراماسىنىڭ باس باپكەرى. ونىڭ جاتتىقتىرۋىمەن قازاقستان بوكسشىلارى ءتورت ءىرى جارىسقا قاتىسى. 2019 جىلى ازيا چەمپيوناتىندا كەنجەباەۆتىڭ شاكىرتتەرى 2 التىن، 2 كۇمىس، 3 قولا جۇلدە ەنشىلەپ، كوماندالىق ەسەپتە باستى قارسىلاسى وزبەكستاننان قالىپ قويدى. ال سول جىلى وتكەن الەم بىرىنشىلىگىندە قازاقستان بوكسشىلارى 1 التىن، 1 كۇمىس، 4 قولا مەدال ولجالاپ، كوماندالىق ەسەپتە وزبەكستان مەن رەسەيدەن قالىپ، ءۇشىنشى ورىن يەلەندى. بيىل مامىردا وتكەن ازيا چەمپيوناتىندا 5 كۇمىس، 1 قولا مەدال العان قازاقستان قۇراماسى جالپى ەسەپتە نەبارى ءتورتىنشى ورىنعا تۇراقتادى. توكيودا ءوتىپ جاتقان وليمپيادادا ەكى قولامەن عانا شەكتەلگەن قازاقستان ازىرگە 10-ورىندا تۇر.

"The Qazaq Times"