كوروناۆيرۋس قوڭىراۋى بويىنشا شاقىرتۋدان قايتىپ جاتقان جەدەل جاردەم بريگاداسى. الماتى قالاسى. 14 شىلدە 2021 جىل. فوتو: QT / كۇلتەگىن اسپانۇلى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى 7,6 مىڭعا ارتىپ، جالپى ەسەبى 649 مىڭنان استى، ونىڭ 154 مىڭى تەك شىلدە ايىندا تىركەلىپ ۇلگەردى. وسى ايداعى ەپيداحۋال ديناميكاسىنا قاراعاندا، كوروناۆيرۋستىڭ جاناما اسەرىنەن كوز جۇمعانداردى ەسەپتەمەگەندە تىكە كوۆيدتەن 1932 قازاقستاندىق (كۆي+ 1644, كۆي- 288) ومىردەن وتكەن. ايدىڭ ورتاسىنا قاراي تاۋلىكتىك كورسەتكىشى 5 مىڭنىڭ ۇستىنە شىققان ىندەتتىڭ ءتورتىنشى تولقىنىندا قازىر كەمىندە 7 مىڭ جاعداي تىركەلىپ جاتىر. سەنبىدە ءجۇز ادام قايتىس بولعان.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 1 تامىزدا كوروناۆيرۋس (كۆي+) جۇققان 7573 ادام، ال 31 شىلدەدە  كوروناۆيرۋس پنەۆمونياسىنا (كۆي-) شالدىققان 87 ادام تىركەلدى. قازىر ەلدە 102 مىڭعا تارتا ادام (كۆي+ بويىنشا 98 مىڭ، كۆي- بويىنشا 2,7 مىڭنان اسا) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي مىڭنان جوعارى ديناميكادا تۇرعان الماتى (1540) جانە استانا (1489) قالالارىنان. قاتارىنان. بۇدان وزگە قاراعاندى (901), شىمكەنت (650), اتىراۋ (408), الماتى (313), پاۆلودار (280), اقمولا (268),  قوستاناي (256), جامبىل (250), اقتوبە (238), ماڭعىستاۋ (224), قىزىلوردا (206), شقو (193), سقو (157), تۇركىستان (115) وبلىستارىندا دەرت ۇدەپ تۇر. وسى جەكسەنبىدە اۋرۋدان ايىققان 4681 ادام ۇيىنە شىعارىلعان. سەنبىدە جيىنى 86 ادام قايتىس بولعان.

#COVID_پنەۆمونياسى 29 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 87 ناۋقاس ەسەپكە الىندى. ۆەدومستۆو دەرەگىنشە، سەنبى كۇنى سىرقاتتار شىمكەنت (17) قالاسى جانە الماتى (9), اتىراۋ، ماڭعىستاۋ (ارقايسىندا سەگىز-سەگىزدەن) (30) وبلىستارىندا كوپتەپ انىقتالعان. سونىمەن قوسا، 106 ادام ايىعىپ شىققان، تاعى 16 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 101 مىڭنان اسا ناۋقاستىڭ 28,5 مىڭى اۋرۋحانادا، 73 مىڭى امبۋلاتورلىق باقىلاۋدا. 1676 مىڭ ناۋقاستىڭ جاعدايى ناشار، ونداعى 402 ادامنىڭ ءحالى وتە اۋىر. بۇدان وزگە 196 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا قازاقستاننىڭ بارلىق ءوڭىرى «قىزىل ايماقتا» تۇر.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 588 مىڭعا جۋىقتاسا، 1 تامىزدان بىلايعى كوروناۆيرۋس پنەۆمونياسى 61 مىڭنان استى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 649 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 12,1 مىڭنان اسا ادام (كۆي+ / U07.1 – 6043, كۆي- / U07.2 – 3740, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 41-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 3,8 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 5,4 ملن شاماسىندا.

"The Qazaq Times"