يزرايل كوروناۆيرۋسقا قارسى ويلاپ تاپقان جاڭا ۆاكتسينا سىناعىنىڭ ءۇشىنشى كەزەڭىن باستايدى. سىناقتىڭ ءۇشىنشى فازاسى زەرتتەۋ رەتىندە ۋكراينا مەن گرۋزيادا وتەدى.

بۇگىنگە دەيىن يزرايلدە ەرەسەك تۇرعىنداردىڭ 80%-دان استامى شەتەلدىك ەكپەنى قابىلداعان. ۆاكتسيناتسيالاۋ ناۋقانىنىڭ قارقىندى جۇرگىزىلۋىنە بايلانىستى ىندەتتىڭ بەتى قايتتى. سوندىقتان بولسا كەرەك، مۇندا جاڭا ۆاكتسينانى تەكسەرۋگە، ەكپە سىناعىنا قاتىسۋعا نيەتتى ادام تابىلماعان. ال سىناقتىڭ سوڭعى ساتىسىندا پرەپاراتتى ىندەت دەندەپ تۇرعان ەلدە ونداعان مىڭ ادامعا ەگىپ، تەكسەرۋ قاجەت.

مالىمەتتەر بويىنشا، ۆاكتسينا ستوماتيت ۆيرۋسى نەگىزىندە جاسالعان. بۇل جانۋارلار اراسىندا تارايتىن اۋرۋ جانە ادامعا قاۋىپسىز. ۆاكتسينا سىناعىنىڭ گرۋزيادا وتەتىنى بەلگىلى بولعان سوڭ، ءدال وسى ەلدەردىڭ الەۋمەتتىك جەلىلەرىندە پرەپارات قاۋىپتى دەگەن اقپارات تاراي باستادى.

وسى اپتادان باستاپ قايتادان «قىزىل ايماققا» ەنگەن گرۋزيادا جاپپاي ەكپە ەگۋ ەندى عانا باستالدى. سەبەبى ۆاكتسينا قولجەتىمسىز بولعان. كەلەسى اپتانىڭ سوڭىنان باستاپ 37 مەديتسينالىق مەكەمەدە الدىن الا جازىلماي، ۆاكتسينا الۋعا بولادى. سونداي-اق گرۋزيادا ءۇش ايدان ارتىق تۇرىپ جاتقان شەتەلدىكتەر تە ەكپە سالدىرا الادى. ال يزرايل ەكپەسىنىڭ ناقتى كىمدەرگە سىنالاتىنى ازىرگە بەلگىسىز.

"The Qazaq Times"