تاشكەنتتەگى تالقى: وزبەكستان باستاماسى الەمنىڭ نازارىن اۋدارۋدا

وتكەن اپتادا وزبەك باسشىسى ساۋىن ايتىپ، بىرقاتار ەلدىڭ وكىلدەرىن تاشكەنتكە جيناعان بولاتىن. ولار ەكى كۇن بويى ورتا ازيا مەن وڭتۇستىك ازيانىڭ ساۋدا-ەكونوميكالىق، ترانزيتتىك مۇمكىندىكتەرىن تالقىلادى. ناتيجەسىندە، وزبەكستاننىڭ ورتالىق جانە وڭتۇستىك ازيانىڭ ساۋدا جۇيەسىن ىشكى جانە حالىقارالىق ساۋدا جۇيەسىن تۇتاستىرۋ تۋرالى جوباسى الەمنىڭ نازارىن وزىنە اۋداردى.

رەسەي، قىتاي، اقش جانە ەۋروپا وداعى قاتارلى 50-دەن استام ەل مەن حالىقارالىق ۇيىمداردىڭ وكىلدەرى قاتىسقان شارانىڭ اۋقىمدىلىعى تۋرالى ايتۋدىڭ ءوزى ارتىق. بۇل ءتىپتى ورتالىق ازيادا وتكەن ەكونوميكالىق ينتەگراتسيالاردى العا جىلجىتۋ بويىنشا ەڭ ۇلكەن حالىقارالىق كونفەرەنتسيانىڭ ءبىرى بولىپ قالدى.

پرەزيدەنت ش.ميرزيەەۆ مالىمدەمەسىندە وزبەكستاننىڭ باستى مىندەتى –كورشىلەس ەلدەرمەن قاتىناستى نىعايتۋ ەكەنىن باسا بەلگىلەدى. سونداي-اق، ءوز ەلىن «ءوزارا تيىمدىلىك نەگىزىندەگى ىنتىماقتاستىققا مۇددەلى، كەلىسىمگە ادال، تاۇراقتى ءارى سەنىمدى مەملەكەت» دەپ كورسەتتى.

شاراعا قاتىسقان تەحاس ا&M ۋنيۆەرسيتەتىنىڭ عىلىمي قىزمەتكەرى ەدۋارد لەموننىڭ ايتۋىنشا ميرزيەەۆتىڭ «بەلسەندى سىرتقى ساياساتى» ساۋدانى كەڭەيتۋگە، ترانس-شەكارالىق تاسىمالدى اشۋعا كومەكتەسە الادى. دەگەنمەن، كۇردەلى اۋعانستان جاعدايىن قوسا قامتىعان ايماقتىڭ ىشكى ماسەلەلەرىنە باسا نازار اۋدارۋعا تۋرا كەلەتىنىن ەسكەرتكەن.

بۇۇ باس حاتشىسى دا وزبەكستاننىڭ بۇل باستاماسىن بەلسەندى قولدايتىنىن، سەبەبى بۇل باستامالار ساۋدا بايلانىسىن دامىتىپ، ءوسۋ جانە تۇراقتى دامۋعا مۇمكىندىك بەرەتىنىن ايتقان. گۋتەرريش ءوزىنىڭ ۆيدەو مالىمدەمەسىندە: «بايلانىس تەك ەكونوميكاعا عانا ەمەس، ايماق ىنتىماقتاستىعىن العا جىلجىتىپ، كورشىلەس ەلدەردىڭ دوستىق قارىم-قاتىناسىن كۇشەيتەدى. سونداي-اق، بۇل باستاما اۋعانستانداعى بەيبىتشىلىك پەن دامۋدى قولداۋ بەلسەندىلىگىن ارتتىرادى، وسى باعىتتاعىن ۇجىمدىق جۇمىستىڭ ماڭىزىن دا ارتتىرا تۇسەدى»، – دەگەن سەنىمىن ءبىلدىرىپتى.

تاشكەندەگى شاراعا تالىپتەردىڭ بارعان سايىن ارتىپ كەلە جاتقان شابۋىل قاۋپىنە قاراماستان اۋعانستان پرەزيدەنتى اشراف عاني دا ۇشىپ جەتكەن. ول كونفەرەنتسيادا اۋعانستانداعى قايشىلىقتى ساياسي جولمەن شەشۋ ۇلتتىق باسىمدىلىق بولاتىنىن باسا ايتقان، سوعان قوسا ەگەمەندى، ءبىرتۇتاس، بەيبىت جانە دەموكراتيالى اۋعانستاندى حالىقارالىق قاۋىمداستىققا قوسا، ايماق ەلدەرى دە مويىندايتىنىن تاعى ءبىر رەت قايتالاعان.

بۇدان وزگە دە ەلدەر مەن حالىقارالىق ۇيىم باسشىلارى تاشكەنتتەگى كونفەرەنتسيادا ايماقتىڭ گەوساياسي تىنىس، اۋعانستان ماسەلەسى، الىپ ايماقتى تۇتاستىرۋ بويىنشا باستامانىڭ ماڭىزى مەن كەزدەسۋى مۇمكىن قيىندىقتارى تۋرالى ويلارىن ورتاعا سالعان. ءبىر سوزبەن ايتقاندا تاشكەننىڭ كەزەكتى باستاماسى ورتا ازيانىڭ ايماقتىڭ جوباسى، وڭتۇستىك ازيامەن جالعاسقان قۇرلىقتىڭ ماڭىزى بار جوبا رەتىندە الەمنىڭ نازارىن اۋداردى. وعان قوسا بۇل جاعدايلار وزبەكستاندى ايماقتىڭ ليدەرلىك ورىنعا ۇمتىلعان مەملەكەت رەتىندە ايگىلەي باستادى.

“The Qazaq Times”