الماتى قالاسىنداعى ورتالىق كلينيكالىق اۋرۋحاناسىنىڭ جانساقتاۋ بولىمىندە كوروناۆيرۋستىڭ اسقىنعان تۇرىمەن اۋىرىپ جاتقان ناۋقاستار. 15 شىلدە 2021 جىل. فوتو: QT / كۇلتەگىن اسپانۇلى

جاز ورتاسىندا سىرقاتتار سانى كۇرت وسكەن قازاقستاندا كوروناۆيرۋستىڭ ءتورتىنشى تولقىنى كۇن سايىن رەكوردىق ماندە ۇدەپ تۇر. كەيىنگى اپتادا (بەس كۇن قاتارىنان) تاۋلىگىنە 5 مىڭنان اسا ادامنان ۆيرۋس انىقتالدى. دەمالىس كۇنى كوروناۆيرۋس پەن وسى تەكتەس پنەۆمونياعا شالدىققاندار سانى تاعى 5343 ادامعا كوبەيدى. سەنبى كۇنى 48 ادام كوز جۇمدى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 18 شىلدەدە كوروناۆيرۋس (كۆي+) جۇققان 5317 ادام، ال 17-ءسى كوروناۆيرۋس پنەۆمونياسىنا (كۆي-) شالدىققان 26 ادام تىركەلدى. قازىر ەلدە 59 مىڭعا جۋىق ادام (كۆي+ بويىنشا 57 269, كۆي- بويىنشا 1618) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي استانا (1367),  الماتى قالاسى (798) جانە قاراعاندى وبلىسىندا (689) تىركەلدى. بۇدان وزگە شىمكەنت (470), اتىراۋ (293), بقو (204),  ماڭعىستاۋ (203), اقمولا (178), تۇركىستان (176), پاۆلودار (170), اقتوبە (159) وبلىستارىندا دەرت ۇدەپ تۇر. وتكەن تاۋلىكتە 1896 ادام ايىعىپ ۇيىنە شىعارىلعان. وتكەن سەنبىدە جيىنى 41 ادام قايتىس بولعان.

#COVID_پنەۆمونياسى 17 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 26 ناۋقاس ەسەپكە الىندى. ۆەدومستۆو دەرەگىنشە، سىرقاتتار استانا (24), شىمكەنت (19), جامبىل (18), الماتى جانە اتىراۋ، اقمولا (ارقايسىندا ون بىردەن) وبلىستارىندا كوپتەپ انىقتالعان. سونىمەن قوسا، 70 ادام ايىعىپ شىققان، تاعى 7 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 59 مىڭعا تارتا ناۋقاستىڭ 19 مىڭنان استامى اۋرۋحانادا، 40 مىڭدايى امبۋلاتورلىق باقىلاۋدا. 1047 ناۋقاستىڭ جاعدايى ناشار، ونداعى 230 ادامنىڭ ءحالى وتە اۋىر. بۇدان وزگە 144 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ۆيرۋستىڭ تارالۋ قاتەرى جاعىنان رەسپۋبليكانىڭ بارلىق ءوڭىرى سارعايىپ-قىزارا ءتۇستى. «قىزىل ايماققا» ەنگەن وڭىرلەر: استانا، الماتى، شىمكەنت قالالارى مەن الماتى، اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، قىزىلوردا، سقو، پاۆلودار وبلىستارى. ال وزگە شقو، جامبىل، تۇركىستان وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 494 مىڭنان، 1 تامىزدان بىلايعى كوروناۆيرۋس پنەۆمونياسى 58 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 552 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 10 905 ادام (كۆي+ / U07.1 – 4997, كۆي- / U07.2 – 3541, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 44-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 798 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"